Таамаглал: Ж.Энхбаяр, С.Бямбацогт нар УИХ-ын даргаас мултарч Л.Энх-Амгалан үлдэв

Энэ сарын 17-нд /2025.10.17/ УИХ-ын чуулганы нэгдсэн хуралдаанаар УИХ-ын дарга Д.Амарбаясгалан өөрийн хүсэлтээр ажлаа өгсөн.  Ингээд дараагийн УИХ-ын дарга, спикер хэн байх вэ гэсэн асуулт одоо ч таамаг хэвээр байна.

Эх сурвалжийн мэдээллээр, УИХ-ын даргын марафонд хэд хэдэн гишүүдийн нэрс яригдаж байгаа талаар бид өмнө нь мэдээлсэн. ЭНД дарж уншина уу. 

Тодруулбал, УИХ-ын даргын сунгаанд ЗГХЭГ-ын дарга С.Бямбацогт, ХХАХҮ-ийн сайд Ж.Энхбаяр, УИХ-ын гишүүн Л.Энх-Амгалан нарын нэрс яригдаж байв.

Тэгвэл бид Ж.Энхбаяр сайд болон ЗГХЭГ-ын дарга С.Бямбацогт тодруулахад, ХХАХҮ-ийн сайд Ж.Энхбаяр “Нэгдүгээрт, би дээрээ Ерөнхий сайдтай кабинетын гишүүн хүн. Хоёрдугаарт, Ерөнхий сайдын асуудлыг эрх барьж байгаа нам Бага хурлаараа шийдсэн. Г.Занданшатар гэдэг Ерөнхий сайдтай байгаа. Ерөнхий сайд намын дарга болно гэсэн манай намын дүрэм ч бий. Тэгэхээр ийм явцуу улс төрийг би тоохгүй байна. Дахин хэлье, би зарчимтай хүн кабинетынхаа зарчмаар ажиллана” гэв.

Харин ЗГХЭГ-ын дарга С.Бямбацогт "Намын Их хурлаар МАН-ын даргад нэр дэвшигч тодорно. Би намын даргад нэр дэвшихгүй" хэмээн байр сууриа илэрхийлсэн юм.

Харин УИХ-ын дараагийн дарга болох хамгийн өндөр магадлалтай хүнээр нэрлэгдээд байгаа УИХ-ын гишүүн Л.Энх-Амгалан одоогоор таг чимээгүй явна.

Хамт горилж байгаа хоёр хүн нь намын дарга болохгүй гэдгээ илэрхийлсэн учир түүний “шанс” бүр ч өндөр болоод явчихлаа. Хэрхэхийг өнөөдөр болж буй МАН-ын Удирдах зөвлөл, шийдэл, зөвшилцөлд хүрч чадахгүй бол ирэх сард болох /2025.11.15/ МАН-ын Их хурлаар шийдэх биз ээ.