“Ерөнхийлөгч хөлөө үнсүүлж, нуруугаа маажуулах гээд байгаа юм уу, хаашаа юм”!
Энэ үгийг одоогийн Төрийн тэргүүн У.Хүрэлсүх 2007 онд УИХ-ын залуу гишүүн байхдаа тухайн үеийн Ерөнхийлөгч, өөрийн хайрт халамжлан хүмүүжүүлэгч Намбарын Энхбаярт хаяглаж байв. Бас “Ирж яваа цагийн дууг харьж яваа улстөрч дуулдаггүй юм” хэмээн шинэ үе гарч ирж байгааг тунхаглаж байсныг хэвлэлийн шарласан хуудас өгүүлнэ.
Үнэндээ Н.Энхбаяр тухайн үед хүчтэй, нөлөөтэйгөөр барахгүй бүгдийг эрхшээлдээ оруулсан хаан явсан цаг. Ямартаа л сайд, гишүүд эхнэр О.Цолмонгийнх нь өмнө бөхөлзөж, гутлынх нь тоосыг арчиж, үдээсийг нь үдэж өгч явах вэ дээ. Чухам энэ үед одоогийн Ерөнхийлөгч У.Хүрэлсүх гэрт нь очиж хоолыг нь буудаж, хуурай хүү нь болж явсан нь түүх юм. Тэгж явахдаа давраад найзуудын хамт “Хадгаламж” банкны 14 тэрбумаар казино тоглосон хэрэг нь илэрч дуулиан тарьдаг юм байна. Тэгээд тэжээсэн бяруу тэрэг эвдэв гэгчээр өөрийг нь улс төрд гаргаж ирсэн халамжлан хүмүүжүүлэгчийнхээ өөдөөс “Та мэддэг юм уу, таны эхнэр мэддэг юм уу” гэснээр түнжин хагарсан түүхтэй. Энэ үед Н.Энхбаярыг хааны сэнтийгээс нь буулгахаар Сү.Батболд, С.Баяр, Ц.Элбэгдорж, Ц.Нямдорж, М.Энхболд тэргүүтэй бүлэглэл үгсэн тохирсон нь У.Хүрэлсүхэд олз болж, 14 тэрбумын хэргийг шүүхийн шатанд “зувчуулж”, эцсийн мөчид “Пургоны хэрэг” хэмээн өнгийг нь хувиргаж замхруулсан билээ. Энэ бол 2006, 2007 оны үйл явдал. Одоогоос 20-иод жилийн өмнө гэсэн үг.
Тэгвэл өнөөдөр У.Хүрэлсүх өөрөө “Намбарван-2” болчихсон яваа юм биш биз гэх асуулт өөрийн эрхгүй урган гарч байна.
У.Хүрэлсүх нь УИХ-ын гишүүн, Мэргэжлийн хяналтын сайд, Онцгой байдлын асуудал эрхэлсэн сайд, Ардын намын генсек, Ардын намын дарга, Шадар сайд, Ерөнхий сайд, Ерөнхийлөгч гэсэн албан тушаалын шатаар тасралтгүй өгссөөр эрх мэдлийн өндөрлөгт гарсан суугаа. Гэвч эзний алба ээлжтэй, хааны алба халаатай. Тэрээр 2027 онд Ерөнхийлөгчийн суудлаасаа бууна. Тэгээд хаачих вэ?
Бидний хувьд эв энгийн байж болох энэ асуулт түүний хувьд хамгаас гашуун асуулт. Гашууны учир тэрээр сүүлийн үеийн үймж бужигнасан их улс төрийн зодооны найруулгыг хөшигний араас хийв үү гэх асуулт. Өөрөөр хэлбэл нүүрэн дээрээ Г.Занданшатар, Д.Амарбаясгалан нарын зөрчил Ардын намаа төдийгүй Монгол төрийг ч самарсан мэт харагдавч арын өрөөнд У.Хүрэлсүх Ерөнхийлөгч удирдаачаар ажилласан байвал яана гэх эмзэглэл бидэнд байна.
Нэгэн цагт Намбарын Энхбаяр Монголын бүх өндөр албан тушаалыг хашчихаад, хамгийн сүүлд Ерөнхийлөгчийн суудлаас буухгүй гэж чаргууцалдсантай адил юм болох юм биш байгаа.
Архив сөхвөл тэрээр 2007 онд “Нийгмийн толь” сонинд Ерөнхийлөгч хөлөө үнсүүлж, нуруугаа маажуулах гээд байгаа юм уу, хаашаа юм гэсэн гарчигтай ярилцлага өгч байсныг сийрүүлэн хүргэе.
Энэхүү ярилцлагыг өгч байх үедээ У.Хүрэлсүх нь 39 настай, УИХ-ын сул гишүүн, харин Н.Энхбаяр улсын Ерөнхийлөгч, МАН-ын хамгийн нөлөө бүхий хүн, харин МАН-ын даргаар М.Энхболд ажиллаж байжээ.
Ярилцлагыг энд дарж уншина уу. https://www.reelnews.mn/a/3154
Тухайн үеийн өдөр тутмын сонинуудын шарласан хуудаснаа үлдсэн түүний ярилцлага, байр сууриуд өнөөдрийн өөрт нь хаяглагдсан мэт байх нь хоржоонтой. Магадгүй хэмжээлшгүй их эрх мэдэл, энэхүү эрх мэдлийн сэнтийд олон жил залрахаараа ямар ч шударга “бурхан” шуналын харанхуйд живдэг байж болох.
Бас нэг хоржоонтой нь тухайн үед улсын №1 дайсан мэт явсан Н.Энхбаяртайгаа өдгөө дөрөө харшуулчихсан, улс орноо авилгаас ангижруулан нүүрсчдээс салгана гэчихсэн тууж яваа.
Л.Ариунганга
