Төрийн түшээ болоод тэрбумтан болсон Э.Бат-Амгалан Хотын дарга болох уу?

Сүүлийн өдрүүдэд МАН-ын дотоод улс төрийн зодоон ил ч нэг, далд ч нэг  үргэлжилсээр байна. Хотын дарга Х.Нямбаатарыг улс төр, эрх мэдлээс зайлуулах кампанит ажил эрчээ авч байгаа талаар бид өмнө нь мэдээлсэн. Энд дарж уншина уу.

Тэгвэл өчигдрөөс /2026.01.12/ эхлэн Нийслэлийн МАН-ын хорооны даргад нэр дэвших улс төрчдийн нэрс эхнээсээ дуулдаж эхэллээ. Тодруулбал,  УИХ-ын гишүүн, Хот байгуулалт, барилга, орон сууцжуулалтын сайд Э.Бат-Амгалан Нийслэлийн МАН-ын хорооны даргад нэр дэвшихээр зэхэж байгаа гэнэ.

Түүний хувьд Баянзүрх дүүргээс нэр дэвшин 2 удаа парламентад сонгогдсон УИХ дахь Засаг дарга нарын фракцийн гишүүн. Нийслэлд 2 том дүүрэг байдгийн нэг нь Сонгинохайрхан, нөгөө нь Баянзүрх. Сонгино угаас Д.Сумъяабазар, Х.Нямбаатар хоёрынх. Тиймээс У.Хүрэлсүх Ерөнхийлөгчийн фракцийнхны хувьд ядахдаа Баянзүрхийг гартаа оруулж, талдаа татах нь чухал байсан. Энэ алхмаа Баянзүрхийн Э.Бат-Амгаланд Барилгын яамыг өгснөөр гүйцэлдүүлсэн. Тэгэхдээ эгзэг нь таарвал нийслэлийг ч өгч болно гэж тохирсон гэх яриа бий. Энэ тохирооны дагуу Баянзүрхийн Э.Бат-Амгаланг МАН-ын дарга Н.Учрал, Ерөнхий сайд Г.Занданшатар нар "энэ албан тушаалд тохирно" хэмээн "үзжээ" гэсэн бор шувуу нисэж эхэллээ.

Э.Бат-Амгалангийн тухайд төрийн түшээд дундаас гишүүн болсноосоо хойш хамгийн их хөлжиж, хөрөнгөжсөн нэгэн.

Учир нь тэрээр, НИТХ-ын төлөөлөгч байхдаа буюу 2019 онд жилдээ 172 сая төгрөгийн орлоготой, 1.2 тэрбум төгрөгийн нэг орон сууцтай, 5.2 сая төгрөгийн хадаламжтай, 614 сая төгрөгийн өр зээлтэй гэж мэдүүлж байсан бол УИХ-ын гишүүн болсныхоо дараа буюу 2022 онд жилдээ 1.4 тэрбум төгрөгийн орлоготой, 2.5 тэрбум төгрөгийн нэг орон сууцтай, 362 сая төгрөгийн хадгаламжтай, өр зээлгүй, бусдаас 300 сая төгрөгийн авлагатай гэж мэдүүлсэн байдаг.

Өөрөөр хэлбэл, Хангарьд ордноос Төрийн ордонд шилжээд ердөө хоёрхон жилийн дотор орлого нь 1.2 тэрбум төгрөгөөр, орон сууц нь 1.3 тэрбум төгрөгөөр өсөн нэмэгдэж, 614 сая төгрөгийн өр зээлээ тэглэж, эсрэгээрээ 362 сая төгрөгийн хадгаламжтай болж бурзайсан гэсэн үг.

Энэ удаад тэрээр Нийслэлийн МАН-ын хорооны даргад санаархаж эхэлжээ. Хэрэв тэр сонгогдож чадвал Нийслэлийн засаг дарга бөгөөд Улаанбаатар хотын захирагчаар өөрийгөө эсхүл өөрийн хүнээ томилох нөхцөл бүрдэх юм.

М.Үүрийнтуяа