Жилийн 5 тэрбумын цалинтай дэлхийн од Э.Амартүвшин Ерөнхий сайдын нэрэмжит шагнал 200 сая төгрөгийг хүртэн цолны найраа Шангри-Лад хийв
МУАЖ Э.Амартүвшинг “Opera Star Awards”-аас “Best Baritone” шагнал хүртсэн түүхэн амжилтад баяр хүргэн, хүндэтгэл үзүүлж Ж.Верди “Травиата” /La Traviata/ дуурийг 2026 оны 2 дугаар сарын 07-ны өдөр амжилттай толилууллаа. Үзэгчид алгаа хорстол ташсан ийм дуурь урд хожид тоглогдоогүй.
Тасалбарын үнэ 280 мянган төгрөг байсан бөгөөд энэ нь дэлхийн одыг дэргэдээс харах, сонсох боломжийн хажууд тийм ч өндөр дүн биш. Тайзнаа гарахын өмнөх өдөр тэрээр /2026.02.06/ Монгол Улсын Ерөнхий сайдын 2026 оны нэрэмжит шагнал 200 сая төгрөгийг ёслол төгөлдөр хүртсэн. Үзэгчдийн халуун сэтгэл огшилт, түүнийг санасан анд нөхөд ахан дүүстэйгээ тэрбээр цолны мялаалгаа өнгөрсөн Ням гаригт буюу хоёрдугаар сарын 8-нд хийв.
Энэ жил нутагтаа шинэлэхээр гэргийн хамт ирсэн Дэлхийн шилдэг баритон найрныхаа тайзнаа дуурийн ягаан театрын үе үеийн дуучдаа урьж хамтдаа “Ээж аав хоёр минь” дууг дуулж сюрприз барьсан юм. Э.Амартүвшин түүний гэргий Д.Туяа нар хоёул сошиал медиагаас хол, даруухан хүмүүс байдаг. Өдгөө нөхрийнхөө менежер болсон Д.Туяа УДБЭТ-ын гоцлол дуучнаар 1998 оноос хойш 14 жил ажиллаад нөхрийнхөө менежер болсон юм билээ.
Нэрт дуучныг дэлхийн хэмжээний од болоход нөр их үүрэг гүйцэтгэж яваа гэргий Д.Туяа Алма-Ата хотын Хөгжмийн дээд сургуулийг төгсөн Итали улсад мэргэжил дээшлүүлсэн, дуурийн олон дүр бүтээсэн авьяаслаг сопрано. Гэвч эцэст нь өөрийнхөа карьерыг орхиж, нөхрийнхөө арын албанд шилжсэнээр тэднийг өнөөдрийн өндөрлөгтөө хүрсэн гэдэг. Тэд хамтдаа Э.Амaртүвшинг УДБЭТ-т гоцлол дуучнаар ажиллаж байх үед Юндэн Нансалмаа, Юндэн Хоролмаа, "Ламбагуайн нулимс" зохиолын Цэрэнлхам, Лодон гэх мэт олон уран бүтээл дээр ажиллаж байсан сайхан дурсамж ч бий. Ийм нэгэн сайхан хосууд дэлхийд эх орныхоо нэрийг дуурсгаж сонгодог урлаг сонирхогчдын сонорыг мялааж явна. Нэрт одын арын албыг хариуцдаг шилдэг менежер гэргий эрхэм дуучны хоолойн цараа хоёр ойрын өдрүүдийн сонирхолтой сэдэв болж байна. Баярлалаа Э.Амартүвшин!
