АН нэр цэвэр гишүүдээ дэвшүүлж, дэнчин авахгүй гэв

Улс төрийн намуудын ирэх дөрвөн жилийн хувь заяаг шийдэх их сонгууль болоход 3 сар гаруйн хугацаа үлдэж буй. Энэ богинохон хугацаанд намууд, нэр дэвшигчид хувь хувийнхаа бэлтгэл базаан, тактикаа боловсруулж сууна. Сонгууль дөхсөн энэ үед улс төрийн нам, эвслүүд энэ сарын 25-наас өмнө мөрийн хөтөлбөрөө гаргаж, дүгнэлт гаргуулах ёстой. Тиймдээ ч нам, эвслүүд ээлж дараалан утас цохиж, иргэдээс мөрийн хөтөлбөрт оруулах санал асуугаад эхэлсэн. 

Тухайлбал Ардчилсан нам 2024 оны сонгуулийн мөрийн хөтөлбөртөө иргэд, олон нийтээс санал авах “Бүтэн Ардчилал” бүсчилсэн хөгжлийн бодлогын хэлэлцүүлгийг 21 аймгаар зохион байгуулж явна. 

Тэгвэл өчигдөр Сүхбаатар, Чингэлтэй дүүрэгт хэлэлцүүлэг өрнүүлжээ. Энэ үеэр Ардчилсан намын дарга Л.Гантөмөр "МАН найман жил засагласан ч, мөрийн хөтөлбөрийнхөө 90 хувийг биелүүлж чадаагүй. Иргэд төрд итгэхээ больсон. Ардчилсан нам цаашдаа том зорилгын төлөө эвлэлдэн нэгдэж, сахилга бат, хариуцлагатай байж чадвал ялна” гэж тодотгон ярив.

"Нэр цэвэр, итгэл хүлээсэн гишүүдээ дэвшүүлнэ, дэнчин авахгүй"

Мөн Л.Гантөмөр дарга “Ардчилсан намын мөрийн хөтөлбөр эдийн засаг, бизнесийн орчныг цэвэрлэхэд чиглэж, гишүүд хэд хэдэн санаа, санаачилгыг хэлсэн. Үүний нэгдүгээрт, бизнесийн орчныг сайжруулахын тулд үргүй зардлыг танаж, төсвийг хумих. Одоогийн Засгийн газар төсвийг хэт тэлсний улмаас бизнесийн орчин жижгэрч байна. Хоёрдугаарт, хариуцлага, сахилга батыг сайжруулах. Гуравдугаарт, боловсролын реформ хийх. Дөрөвдүгээрт, авлига. Авлигыг бүрэн зогсоох хууль эрх зүйн орчныг бий болгох хэрэгтэй байна. Тавдугаарт, Монголын эрчим хүчний асуудлыг шийдээч гэсэн саналуудыг хэлж байна” гэв.

Мөн түүний хэлснээр "УИХ-ын сонгуульд иргэдийнхээ итгэлийг хүлээсэн, хэрэг түвэгт холбогдоогүй, нэр цэвэр гишүүдээ дэвшүүлэх бодлого барьж байгаа, Ардчилсан нам ямар нэг байдлаар нэр дэвшигчээсээ дэнчин авахгүй. Бид бага мөнгөөр амжилтад хүрнэ. Эмэгтэйчүүдийн квотоо 30 хувьдаа барина. Ялж чадах эмэгтэйчүүд байвал 40 хувьд ч хүргэхэд бэлэн” гэдгийг онцолжээ.