Сонгууль угтсан эрх баригчдын галзуурал
Сонгууль ч аргагүй ойртож, хөдөө гадаагүй галзуураад эхэлчихэж. Ялангуяа эрх баригчдын рейтинг тун муу, найман жилийн ажилдаа “онцмуу” дүн авахаа мэдэж байгаа болохоор бүр ч галзуурч байна. Аргагүй, тэд “Алсын хараа-2050” гэж мөрөөдлөө сонгогч олонд тулган ярьж өгснөөс хойш багагүй хугацаа өнгөрч, үүнийхээ араас “Шинэ сэргэлтийн бодлого” гэх үлгэр яриад олон оныг үдсэн ч биеллээ олсон нь үгүй. Сүүлдээ сонгуулийн тойргийг бүсчилж 13 болгосондоо бантаж, “Бүсчилсэн хөгжил” хэмээн тархи угааж эхлэв. Бас л газар авах шинжгүй. Ядахад Хөгжлийн банк, Нүүрсний хэрэг гэх зүйл гаргаж ирээд худлаа баахан шоудсан ч өнөөх нь МАН-ын өндөр эрх мэдэлтэнд тулж очоод гацаж байна. Ганц хоёр хүнийг ял зэмд унагааж өдөр хоног өнгөрөөж байгааг ч анзаарсан биз. Сонгууль хийж болно ийм галзуу солиотой байж болохгүй гэдгийг МАН-д сануулъя.
“ШУВУУ” АЖИЛЛАГАА ГЭР ШАТААСАН СЭЖИГТНЭЭР ӨНДӨРЛӨВ БОЛОЛТОЙ
Засгийн газраас “Таван Ш” ажиллагаа гэж зүйл босгож, үүний хүрээнд Т.Бадамжунай гэх өвгөнийг барьж ирснээс өөр зүйлгүй сураг алдарсан. Тиймээс арга ядсан эрх баригчид "Шувуу" ажиллагааны хүрээнд гэр шатаасан “Б” гэх нөхрийг Туркээс баривчлан авчирсан хэмээн Цагдаагийн газраас мэдээлэл хийлгэв. Цаашид энэ ажиллагаа газар авахгүй өндөрлөнө гэдгээ үүгээр харуулсан явдал болов. Тэдний тайлбарлаж байгаагаар бол сэжигтэн “Б” нь 2019 онд Баянзүрх дүүрэгт оршин суух иргэний монгол гэрийг санаатай галдан шатааж, хүнийг алахаар завдсан гэх үйлдлээр шалгагдаж байхдаа оргон зайлсан гэж тайлбарлав.
Х.ХЭРЛЭН 400 САЯ ТӨГРӨГӨӨР 2160 ШАГНАЛЫН ТЭМДГИЙН ТЕНДЕР ЗАРЛАВ
Улаанбаатар төмөр замын дарга Х.Хэрлэн сонгууль угтсан нэгэн тендер зарлаж, өөрийг нь өргөж тэтгэсэн дарга нарт тал засав бололтой. Тодотговол, тэрбээр 400 сая төгрөгийн тендер зарлаж, үүнд 900 ширхэг Төмөр замчны алдар, 860 ширхэг Тэргүүний төмөр замчин, 500 ширхэг Онц хөдөлгөөнчин тэмдэг хийлгэхээр болжээ. Х.Хэрлэн дарга бол Ерөнхийлөгч У.Хүрэлсүхийн өргөж дэмждэг нөхөр нь бөгөөд өдгөө МАН-ын дарга нартай ая талаа олчихдог, сонгуульд туслахаар өөр аргагүй хүний нэг. Тийм учраас сонгууль угтан, төмөр замчиддаа тэмдэг тарааж, хэдэн санал нэмэрлэх гэсэн бололтойг энэхүү мэдээлэл харуулж байна.
“Х.НЯМБААТАРЫН ТЕНДЕР”-Т 20 КОМПАНИ САНАЛ ИРҮҮЛСНИЙГ ӨӨРӨӨ ЗАРЛАЛАА
Хотын дарга Х.Нямбаатар Улаанбаатарт метро барих ямар ч боломжгүйг мэдсээр байж олон улсын нээлттэй тендер зарлаж, нийслэлийн гудамж талбай бүрд зар сурталчилгаа байрлуулан, эзэддээ тус болсон. Тиймээс метроны бус “Х.Нямбаатарын тендер” гэх нэртэй болоод буй. Гэтэл асар хурдтайгаар “Метро барих төслийн зөвлөх үйлчилгээ үзүүлэх олон улсын нээлттэй тендерт 11 улсын 20 компани саналаа ирүүллээ" гэсэн мэдээлэл цацаж, өчигдрийн хэвлэл мэдээллийн хэрэгслийг эзэгнэж өнжив. Одоо үнэлгээний хорооноос 20 компанид урилга хүргүүлж, тендер сонгон шалгаруулалтын ажлыг явуулах аж. Шалгарсан баг Улаанбаатар метроны зураг төслийг боловсруулах, барилга угсралтыг хийх компанийн тендерийн жишиг баримтыг нийслэлд хүлээлгэн өгөх юм байна. Түүний дараа үндсэн инженеринг болон гүйцэтгэгчийг шалгаруулах хоёр дахь үе шат эхлэнэ гэжээ. Метро барих тендер ярьж, тууз хайчлаад сонгууль давуулах нэгэн төлөвлөгөөт ажил гэдэг нь эндээс харагдана.
Д.БУМ-ОЧИР ЗӨВЛӨХ У.ХҮРЭЛСҮХИЙГ ЧИНГИС ХААНААР ТОДРУУЛАХДАА ТУЛАВ
Ерөнхийлөгчийн Соёл, шашны бодлогын зөвлөх Д.Бум-Очир: "Хархорум хот байгуулах Чингис хааны зарлигийг Монгол Улсын Ерөнхийлөгч У.Хүрэлсүх энэ цаг үед үргэлжлүүлэн биелүүлж байна" гэж ноёноо Чингис хаанаар бараг л тодруулчихлаа. Ингэхдээ Хархорум хотын зураг төслийн ажлын тендерийг 1.6 тэрбум төгрөгөөр зарлаж байгааг мэдэгдсэн. Тэгвэл Эдийн засгийн бодлогын зөвлөх Б.Даваадалай “"Шинэ Хархорум" хотод 500 мянган хүн оршин суух бөгөөд 285 мянган ажлын байр бий болж, үүнийг даган бүс нутгийн хөгжлийг тэтгэх гол хот болно гэж тооцоолж байна. Энэ тохиолдолд багадаа хоёр их наяд төгрөгтэй тэнцэх хэмжээний хүнсний эрэлт хэрэгцээ гарна” хэмээж байна. Үүнийг баруун аймгууд хангана гэж хэнэг ч үгүй тайлбарлаж зогсох юм. Сонгууль хийж болно. Ийм галзуу байж болохгүй.
С.БАЯР
