Д.Амарбаясгалан авлигач, хулгайч нараа дэвшүүлэхээс аргагүй гэдгээ мэдэгдлээ

Том амлах хэцүү. Дараа нь түүнээсээ буцах бүр ч хэцүү. Ялангуяа МАН шиг авлигач, хулгайчид үүрлэсэн намыг удирдан базаж байгаа хүн ам гарах бүр хэцүү.

МАН-ын генсек “Авлига, албан тушаалын гэмт хэрэгтэн, түүнд холбогдож байсан хүмүүсийг шат шатны сонгуульд нэр дэвшүүлэхгүй” гэж удаа дараа мэдэгдэж байсныг уншигч та санаж байгаа байх. Харамсалтай нь ууган намын генсек энэхүү амлалтаасаа нэгэнт буцжээ.

МАН-ын XXX Их хурал гэж сүрхий зүйл 2021 оны арванхоёрдугаар сард болж байв. Энэ үеэр МАН-ын Ерөнхий нарийн бичгийн дарга Д.Амарбаясгалан “Авлига албан тушаалын гэмт хэрэгт холбогдсон хүнийг шат шатны сонгуульд нэр дэвшүүлэхгүй. Гэмт хэрэгт холбогдоод яллагдагчаар татагдсан тохиолдолд шууд намын гишүүнээс түдгэлзүүлдэг, шүүхээр гэм буруутай нь тогтоогдвол гишүүнчлэлээс хасах заалтууд оруулна” хэмээн мэдэгдэв.

Үүнээс 2 жилийн дараа буюу 2023 оны гуравдугаар сарын 28-ны өдөр Төрийн ордонд мэдээлэл хийхдээ “Шинээр өргөн барьж буй хуулиар бүх шатны сонгуульд авлига албан тушаалын гэмт хэрэгт холбогдож, ял шийтгэл эдэлсэн хүн нэр дэвшихгүй байх бүх нөхцөлийг хангаж өгсөн. Тиймээс гэмт хэрэгт ямар нэгэн байдлаар холбогдсон хүмүүс шат шатны сонгуульд нэр дэвшихгүй гэдгийг хатуу анхааруулж байна” хэмээн ахин нэг том амлав.

Гэтэл 2024 оны гуравдугаар сарын 18-ны өдөр буюу нэг жилийн дараа “Эхэлж тойргууд дээр судалгаа зохион байгуулаад, тавдугаар сарын 20-ны дотор багтаан долоо хоногийн хугацаанд нэр дэвшигчийг тодруулах үйл ажиллагаа зохион байгуулна. МАН-ын хувьд нэр дэвшигчийг өөрийнх нь хүсэлтээр нэр дэвшүүлэх гэдэг асуудлыг авч хэлэлцэхгүй. Олон нийтийн зүгээс тухайн тойргийг хэнээр төлөөлүүлэхийг хүсч байна, тэр нэр дэвшигчийг дэвшүүлнэ гэдэг байдлаар асуудалд хандаж байгаа. Тэр зарчмын дагуу явна” гэж байр сууриа илэрхийлсэн.

Өөрөөр хэлбэл “Үзэгчдийн хүсэлтээр” гэдэг шиг “Бид ард түмний нам учраас ард түмнийхээ саналыг хүндэтгэсэн” гээд дайрчих юм байна. Авлигач, албан тушаалын гэмт хэрэгтэн, ямар нэг хэрэгт холбогдож байгаагүй хүн олоод ир гэвэл МАН-аас лав олдохгүй. Өдгөө УИХ-д сууж байгаа 62 гишүүнээс ч олдохгүй. Д.Амарбаясгалан ч өөрөө нэр дэвших эрхгүй хүн. Асан, агснуудаас нь ч олдохгүй. Тэгэхээр ах намынхан нэр цэвэр хүмүүсээ томсгож, бүсчилсэн тойрогт явуулаад үз л дээ. Одоо байгаа суудлаа 10 дахин багасгах байлгүй. Энэ чинь авлигачин, хулгайч, хүчиндэгч, дээрэмчин, бөхчүүд гээд мөнгөтэй одууд тодордог тойргийн систем. Мянган Харвардын диплом харуулж, онол ном яриад ч босгоо давуулдаггүй онцлог бүхий сонгогчидтой бүрэн улс.