Хөгжлийн банкныхан нүүрсний мафитай наймаалцчихав уу
Энд цахим дүүрэн давалгаалж байхад олон зүйл нуршаад яахав. Хөгжлийн банкны хэрэгт холбогдогчид нүүрсний мафийн оффтейк буюу нууц гэрээ гэх томоохон баримтыг гартаа хийсэн гэх эх сурвалжийн мэдээлэл байна. Хөгжлийн банкны хэрэгт холбогдогчдын гарт байгаа баримт ил болвол Ерөнхийлөгчөөс эхлээд МАН-ын өндөр дээд албан тушаалтнаас бүрдэх нүүрсний мафийн “нууц” гэх халхавчтай гэрээ ил болж, ирэх сонгуульд ялах нь бүү хэл дүүжлүүлэхдээ тулна.
Нүүрсний хэрэг хэмээн шүгэл үлээж, олон хүнийг зарлан, хэлэлцүүлэг хүртэл зохион байгуулж явсан эрх баригчдын болон компанийн нэрс, он сартайгаа гараад ирвэл юу болно гэж санаж байна. Тиймээс Хөгжлийн банкны холбогдогчидтой тохиролцож наймаалцахаас өөр арга байгаагүй бололтой. Түүнээс биш МАН сонгууль дөхөж байгаа энэ үед яаран сандран хөзрөө дэлгэх учиргүй.
Нэг зүйлийг дурдахад Хөгжлийн банкны хэрэгт шалгагдаж байсан нөхдийг “бүхэлд нь цагаатгасан” гэх мэдээлэл байгаа нь ташаарсан зүйл аж. Тодотговол, УИХ-ын гишүүн Ё.Баатарбилэг нарт холбогдох хэргийг нотлох баримт хангалтгүй, гэмт хэргийн шинжгүй гэсэн үндэслэлээр анхан шатны шүүхэд шилжүүлсэн юм билээ.
Ингэхээр энд бас нэг сонин зүйл үүссэн. Тэдний хэргийг нотлох баримтгүй, гэмт хэргийн шинжгүй хэмээн анхан шатны шүүхэд буцаах энэ процесс нь өөрөө тэднийг яллагдагч биш болгож байна. Өөрөөр хэлбэл тэд нэр дэвших эрх нь нээлттэй, шүүхээс тогтоож өгсөн ямар нэгэн хориггүй, дундын бүсэд шилжээд байна гэсэн үг. Үүний цаана ч МАН-ын дотоодын ямар нэг шалтгаан байгаа байх. Саяхан л прокуророос ял нь хөнгөн байна гэх үндэслэлээр буцааж байсан хэрэг гэнэт ийнхүү хэрэгсэхгүй болж байгаа нь л хамгаас илүү сонирхол татаж байгаа юм.
Үйл явдлаас хараад байхад нууц гэрээг аль талаас гартаа оруулж авсан бэ гэдэг асуудал ч аяндаа үүснэ. Энэ нь гэнэт өчигдөр шийдчихсэн зүйл биш. Өнгөрөгч онд 32 хүн, дөрвөн хуулийн этгээдийг гэмт хэрэг үйлдсэн гэм буруутайд тооцон эрүүгийн хариуцлага оногдуулсан бол УИХ-ын гишүүн Х.Ганхуяг, Г.Амартүвшин, Н.Алтанхуяг нарын 48 хүнд холбогдох хэргийг хэрэгсэхгүй болгож шийдвэрлэснээс эхтэй.
Өөрөөр хэлбэл, МАН-ынхан Хөгжлийн банкинд гол гарын үсэг зурж байсан Г.Амартүвшин, холбогдогч Х.Ганхуяг нарыг хэргээс мулталж аваад бусдыг нь гэмт хэрэг үйлдсэн юм шиг харагдуулсан. Хөгжлийн банкны будилаан үүсэх үндэс суурийг тавьсан гол автор Н.Алтанхуягийг цагаатгаж, “Фортуна” Н.Батбаярыг хөөн хэлэлцэх хугацаа дууссан нэрээр суллачихаж байгаа нь цаашид Хөгжлийн банкны гэх хэрэг дурдагдахгүй болж байна.
Эцсийн эцэст энэхүү нууц баримтыг хэн олж өгч, Хөгжлийн банкны хэрэгт холбогдогчдын амийг аврав гэхээр Ерөнхийлөгч асан Х.Баттулга байх магадлал өндөр харагдана. Нууц зүйл гэж байхгүй. Үүнийг цаг хугацааны явцад улс төр, бизнесийн үйл явдал өөрөө ил болгож өгнө.
Нэгэнтээ Х.Баттулга Ерөнхийлөгчөөр, У.Хүрэлсүх Ерөнхий сайдаар, дүү Л.Оюун-Эрдэнэ нь Засгийн газрын гал тогоог барьж байх цар тахлын хүнд үед нэг бус удаа оффтейк гэрээ байгуулсан гэдгийг мартаж болохгүй. Үүний мөрөөр л жараахайнууд орж нэр холбогдсон болохоос биш том асуудал толгойдоо л бий. Ямартай ч Хөгжлийн банкныхан хэн нэгэн нууцад нэвтрэх боломжтой, түүнийг сайн мэдэх нөхрийн тусламжтайгаар нүүрсний мафитай наймаа тохиролцоо хийж, энэ хэрэг эзэн холбогдогчгүй түүх болон үлдлээ.
С.Баяр
