Суудал горьдсон намын "ялаанууд"
Б.Батцэцэг сайд сонгуулийн саналын хуудас хэвлэлтэд дахин гар дүрэх вий
Сонгууль дөхөөд ийм нэг сэдэв гарч ирдэг. Учир нь Гадаад харилцааны сайд Б.Батцэцэгийн “Мөнхий үсэг” ХХК нь 2016 оны, “Монголын үнэт цаас хэвлэл” ХХК нь 2020 оны УИХ-ын сонгуулийн саналын хуудас хэвлэлтэд оролцож байсан билээ.
Тэрбээр, “Монголын үнэт цаас хэвлэл” ХХК-даа 2008 оноос хойш хувьцаа эзэмшигчээр бүртгэлтэй, 52 хувийн ногдол ашиг хүртдэг гэдгээ ХОМ-тээ одоо ч мэдүүлсэн байдаг. Мөнхий үсэг ХХК-ийнхаа ч 52 хувийн эзэмшигч нь.
Өнгөрсөн 2020 оны УИХ-ын сонгуулиар Баянхонгор аймгийн тойрогт нэр дэвшиж байсны хувьд энэ нь ашиг сонирхлын, асар том зөрчил гэгдэж байв. Гэвч УИХ-д гарч чадалгүй өвдөг шороодсон. Одоогийн Ерөнхийлөгч У.Хүрэлсүх Засгийн тэргүүн байхдаа танхимдаа сайдаар оруулж ирж, албан тушаалтай золгуулж байлаа. Дараагийн Ерөнхий сайд Л.Оюун-Эрдэнэ гарч ирсэн ч, “давхар дээлгүй” тул суудалдаа үлдсэн.
Энэ удаагийн 2024 оны УИХ-ын сонгуульд найман мандат бүхий Архангай, Өвөрхангай, Баянхонгор аймгууд нэгдүгээр тойрогт нэр дэвших сонирхолтой байгаа. Нэр дэвшигчдийн судалгаагаар “сайн” гарсан гэдэг. Энэ нь өнгөрсөн дөрвөн жилийн сайдын суудлын зангарагийнх. Нөгөө талаар тойргоо эртнээс сайн усалсных.
Түүний том асуудал салбартаа монополь эрх ашигтай хэвлэлийн компаниуд нь. Гурван компани нь зөвхөн 2020 оноос хойш 32 тендерт ялж, 2.8 тэрбум төгрөг авсан байдаг. Улстөрд өндөр дээд албан тушаал хашиж байгаа хэрнээ дээрх компаниуддаа хувьцаа эзэмшиж, тендерт шалгарсаар байгаа явдал. Бизнес эсвэл улстөр гэдэг сонголтоо хийдэг баймаар байна.
Д.Оюунхорол сэрж, тойрог горьдож сууна
Д.Оюунхорол гэхээр л “унтаж буй зураг” нь санаанд ордог хүн цөөнгүй биз. Тэгвэл тэр 2024 оны сонгуулийн сургаар хамгийн эрт сэрсэн хүмүүсийн нэг. Учир нь 2024 оны нэгдүгээр сарын 01-тэй зэрэгцэн Хөшигийн хөндийн бүтээн байгуулалтын асуудал хариуцсан даргын суудлаа өгчихсөн. Завхан нутгийн харъяат тэрбээр намаасаа жагсаалт горьдож, бүр болохгүй бол тойрогт нэр дэвшинэ гэсэн бэлтгэлтэй суугаа юм.
Нөгөө талаар Хотын дарга асан М.Энхболдын фракцад харъяалагддаг байсан тулдаа ажилтай байсан ч гэж хэлж болохоор. 2021 оны үес намын даргынх нь болоод Ерөнхий сайдынх нь суудал ганхах эрсдэлтэй цагт Л.Оюун-Эрдэнэ түүнийг Хөшигийн хөндийн бүтээн байгуулалт руу явуулж, нам доторх фракцуудтайгаа тохироо хийж байсан билээ.
Түүний хувьд, 2000-2004, 2008-2012, 2012-2016 оны хооронд УИХ-д сонгогдон ажилласан. 2016 оноос хойш уг нь намдаа тоогдож, Хөшигийн хөндийд өөртөө ахадсан албан тушаалтай суусан ч, УИХ-д орж ирэхийг илүүд үзжээ.
