Мөрийн хөтөлбөрийг “Алсын хараа 2050” руу шахаж, МАН даажигналыг гүйцэлдүүлэгч Д.Загджав
МАН даажигналаа ҮАГ-ын орлогч Д.Загджаваар гүйцэлдүүлэв. Энэ нь 27 нам, хоёр эвслийн бүгдийнх нь мөрийн хөтөлбөрийг хүлээж авахгүй буцааснаар илэрч байна.
Тэрбээр, төрийн ордонд зогсож байгаад “Эдийн засгийн тооцооллуудыг үзсэн. Зарим нэг засч залруулах ёстой зүйлүүд байгаа юм аа” гэж том дуугарсан. Гэхдээ буцаасан шалтгаан нь өөр гэдгийг Ардчилсан намынхан зарлалаа. Тодорхой хэлбэл, МАН-ын дарга Л.Оюун-Эрдэнийн санаачилж, Монгол Улсын хөгжлийн баримт бичиг болгосон “Алсын хараа 2050”-д намуудын мөрийн хөтөлбөр нийцээгүй гэж үзжээ. Хэрэв энэ үнэн бол жинхэнэ коммунизм айсуй. Улс төрийн намууд бодлогоо эрх баригч намын баримт бичигт нийцүүлнэ гэдэг яавч эрүүл үзэгдэл биш. Эх орноо өөр өөрсдийн уралдуулсан бодлогоор хөгжүүлэх эрх чөлөө ардчилсан гэх тодотголтой Монгол Улсад байхгүй болно гэдэг ч гутамшиг.
Дээр нь Д.Загджав гэдэг салбар бүрт гар дүрж, албан тушаал дамжиж насаараа эрхэлсэн намын тавиулуудаар бодлогоо шүүлгэнэ гэдэг хэчнээн онигоотой. Ардчилсан намынхаас гэхэд л 900 зүйл заалтаас 60-ыг нь буюу 6,4 хувийг нь буцаажээ.
Уг нь тус нам мөрийн хөтөлбөртөө дэлхийн хөгжлөөс дээгүүр болох 9 зорилт, заавал хийх 90 ажил, 900 гаргалгаатай гэсэн билэгдлийн бүтцийг агуулж. Үүнийгээ “Эрчимт хөгжлийн 9:90:900 хөтөлбөр” гэж тодотгож буй. Нарийвчилбал, татварыг 5 хувь болгох, Эрчим хүчний 80 хувийг дотооддоо үйлдвэрлэдэг болж, хараат байдлаас гаргах, 10 мянган инженер гадаадын топ их дээд сургуулиудад сургах гэхчлэн чухал зүйлс багтаасан нь анхаарал татсан.
Одоогийн 10 хувийн татварууд хоёр дахин буурч, эрчим хүчээ шийдчихвэл иргэдийн нуруун дээрээс ямар их ачаа хөнгөрөх билээ. Мөн өнгөрсөн найман жилийн алдааг нөхөх, төрийн дарамтийг багасгах, Монгол хүн өргүй, хүн төвтэй, хувь хүний хөгжлийг бүхний эхэнд тавьсан зэрэг онцлогууд багтаасан нь дуулдсан. Олон фракцуудынхаа эрх ашиг, шаардлагыг тусгасан сайн мөрийн хөтөлбөр боловсруулагдсан гэгдээд байв.
Харин эрх баригчид “Алсын хараа 2050” тунхаглалаасаа гадна Монгол Улсыг 2030 он хүртэл хөгжүүлэх “Шинэ сэргэлтийн бодлого-Бүсчилсэн хөгжлийн реформ” гэсэн сүржин нэр томъёогоо ч багтаажээ. Энэхүү мөрийн хөтөлбөрийн агуулга, зорилго бүрэн хангагдсанаар 2028 онд нэг хүнд ногдох ДНБ-ийг 10 мянган ам.долларт хүргэнэ гэж тунхаглаад буй.
Боломжгүй зүйл гэдэг талаасаа ч чамгүй шүүмжлэл дагуулсан. Ямартай ч Сонгуулийн тухай хуулиар нам, эвслүүд мөрийн хөтөлбөрөө засаад энэ сарын 17-нд Д.Загджавт дахин хүргүүлнэ. ҮАГ дөрөвдүгээр сарын 26-ныг хүртэл дахин хянаж, дүгнэлтээ гаргаад Сонгуулийн ерөнхий хороонд хүргэх билээ. Улс төрийн жижиг намууд мөрийн хөтөлбөрөө “Алсын хараа 2050”-д хэрхэн нийцүүлэх үү, МАН-ын босго давах уу гэдэг нь 27-ныг хүртэл анхаарал татах сэдэв байх нь. Үүнээс, ХҮН, АН-аас эхлээд МАН-ын дагуул, хэлснийг нь хийдэг утсан хүүхэлдэй биш сөрөг хүчин гэдгээ харуулж чадах уу.
