Ерөнхийлөгчийн дүү У.Отгонбаярын тойргийг суллахын тулд АН-ынхныг намнах ажиллагаа
Өнгөрсөн доло хоногт АТГ-ынхан гэнэт хэвлэлийн хурал зарлаж, сүржин даржин мэдээлэл хийж Сүхбаатар аймгийн удирдлагуудыг онилов.
Тодруулбал, Сүхбаатар аймгийн Засаг дарга М.Идэрбат, ИТХ-ын дарга Д.Хосбаяр, Газрын харилцаа, барилга, хот байгуулалтын газрын дарга Э.Төгөлдөр тэргүүтэй дөрвөн хүнийг шалгаж эхэлсэн нь ил боллоо.
Гэвч сумны үзүүр чухам яг хэн рүү чиглэснийг цухуйлгаад орхисон. Ингэхдээ “Сүхбаатар аймгийн Засаг дарга нь нэр бүхий УИХ-ын гишүүний үеэл дүүгийн эзэмшлийн, тус аймгийн III багийн нутагт байрлалтай 6700 болон 1359 ам метр талбай бүхий газрын зориулалтыг Газрын тухай хууль болон газар эзэмших, ашиглах эрхийн гэрчилгээ олгох журмыг зөрчиж, зориулалтыг нь өөрчлөн олгож, бусдад давуу байдал бий болгосон байж болзошгүй” гэж мэдээлсэн юм.
Үүнд мэдээж Сүхбаатараас сонгогдсон УИХ-ын гишүүд гэвэл АН-ын хоёр л нэрлэгдэнэ.
Долоон мандат бүхий Сүхбаатар, Дорнод, Хэнтий аймгийн зургаадугаар тойрогт нэр дэвшихээр сонирхолтой дүрүүд горилж байгаа. МАН-аас Ерөнхийлөгч У.Хүрэлсүхийн төрсөн дүү У.Отгонбаяр Д.Амарбаясгалангаас мандат авч чадвал ХЗДХ-ийн сайд Б.Энхбаяр, УИХ-ын гишүүн Ц.Сэргэлэн, “аварга” Б.Бат-Эрдэнэ гэхчилэн хөвөрнө.
Харин АН-аас Ж.Батсуурь, Н.Ганибал, АПУ-гийн П.Батчимэг, Т.Пүрэвхатан нар үзнэ.
Энэ тойргийг Ерөнхийлөгчийн дүү У.Отгонбаяр эртнээс тойглож, суллаж ирсэн. Ямар сайндаа л саях зуднаар УИХ-ын гишүүдийг дагаж баахан “Улсын аварга малчин”-ы тэмдэг тараах вэ. Ж.Батзандан, түүний төрсөн ах Ж.Бат-Эрдэнэ нарыг удтал шалгаж хоргоосон. Ж.Бат-Эрдэнээс аймгийн намын хорооны тамгыг нь авсан. Одоо АТГ аймгийн удирдлага, ИТХ-ын дарга нарыг сандаргаж яваагийн сэжүүр ийм байхыг үгүйсгэхгүй.
Хэнтий, Дорнодод АН-ын суурь муу, АН хоёр гишүүнтэй болсон Сүхбаатар аймаг ихээхэн анхаарал татаж байна.
