Сонгууль-2024: Гишүүнд горилж буй хэвлэлийнхэн
Энэ жилээс УИХ 126 гишүүнтэй болно. Энэ хэрээр мөнгөтэй, артай бол нэр дэвших, гишүүнд горилох таних, танихгүй кандидатууд олширч байна. Энэ удаад хэвлэл мэдээллийн салбараас шинэ паралментад гишүүн горилж буй нэр дэвшигчдийг танилцуулъя. Тэднийг ажвал бүгд төрийн гурван өндөрлөгийн “бараа бологч” нар байх аж.
Ерөнхий сайдын хэвлэлийн төлөөлөгч Ч.Болортуяа жагсаалтаар гоцолно
Албаны мэдээлэл түгээхдээ хувийн хуудсаараа дамжуулж орохоор тохируулдаг эго өндөртэй хэвлэлийн төлөөлөгч гэх шүүмжлэлийн эзэн iKon.mn сайтын үүсгэн байгуулагч, Ерөнхий сайдын хэвлэлийн төлөөлөгч, сэтгүүлч Ч.Болортуяа. "Өнөөдөр" сонинд сурвалжлагч, GoGo.mn сайтад сэтгүүлчээс Ерөнхий редактор хүртэл ажиллаж байгаад 2013 онд iKon.mn-ийг үүсгэн байгуулсан. 2018 онд улс төр, төрийн албан тушаалтнуудын сүлжилдсэн алдарт ЖДҮ сангийн дата сурвалжилгыг хийж дуулиан тарьж байсан. Шинэ тутам хөгжиж буй дата сэтгүүл зүйг хөгжүүлэхэд үнэтэй хувь нэмэр оруулсан гэж онцолж болно. Энэ сонгуулиар Ерөнхий сайдын ивээл дор “ах” намын жагсаалтад бичигдэх бүсгүйчүүдийн нэгээр нэрлэгдэж буй. Сэтгүүлчийн тухайд чамбай ч хувь хүний харизмын тухайд сулхан кандидат.
Ерөнхийлөгчийн хэвлэлийн төлөөлөгч Ө.Золбаяр говийн бүсэд нэр дэвшинэ
Ерөнхийлөгч У.Хүрсэлсүхийн хэвлэлийн төлөөлөгч Ө.Золбаяр 2006-2012 оны долдугаар сар хүртэл “ТМ” телевизийн мэдээний албаны дарга, 2012 оноос “Ийгл” телевизэд тоймч, ахлах редакторын алба хашиж байсан ажлын намтартай. Ж.Эрдэнэбатын засгийн газар унаж одоогийн Ерөнхийлөгч У.Хүрсэлсүхийг засгаа авахад хэвлэлийн албыг нь базаж байсан Хүүкийн “шадар гурван цэрэг”-ийн нэг. Тодруулбал ЕТГ-ын дэд дарга А.Үйлстөгөлдөр, АНУ-ын Чикаго хотод суугаа дэд консул, сэтгүүлч Ц.Ганзориг, Ө.Золбаяр гурав Хүүкийн дуулиан шуугиантай засаглалын он жилүүдэд дэргэдээс нь дэмнэж, хажуунаас нь хаацайлж явсан гурав. Тиймдээ ч шадар гурван цэрэг гэгдэх болсон. Энэ удаад хурандаа Хүүк Ө.Золбаярыгаа Өмнөговь буюу говийн бүсэд нэр дэвшүүлэхээр бэлтгэж буй. Улс төрийн тогоонд 6 жил чанагдсан, угийн буурь суурьтай Ө.Золбаяр 6 хүүхэдтэй өнөр бүлийн тэргүүн, жирийн монгол хархүү. Азхүү байвал ёозхүүгээр цохиод гараад ирж мэднэ. Ядахдаа нэр цэвэр, нас залуу юм даа.
Экс ерөнхийлөгч Х.Баттулгын хэвлэлийн төлөөлөгч Ж.Цэсэн зүүн бүсэд хүч үзэх үү
Сэтгүүлч, яруу найрагч, “Талын түрлэг” номын зохиогч, МҮОНРТ-ийн ҮЗ-ийн гишүүн, экс ерөнхийлөгч Х.Баттулгын үе үеийн хэвлэлийн төлөөлөгч Ж.Цэсэн “Женко”-д үнэнч хувирашгүй зүтгэлт албатуудын нэг гэдгээрээ зартай. Сүхбаатар аймгийн харьяат сэтгүүлч бүсгүй оны өмнөөс Сүхбаатар луу гүйдэлтэй болсон нь “Женко”-гийн квотоор нэр дэвшихээр зэхсэнийх. Ямартаа л 10 цэнхэр дээл оёулж аюулын ихээр бэлдсэн. Гэвч тойрог томорсоноор асуудал яаж эргэхийг таашгүй. Гагцхүү судалгаа бүхнийг шийднэ “гэжуга” цаг.
Ж.Цэсэнгийн тухайд 6 жилийн өмнө Ерөнхийлөгчийн хэвлэлийн албаны дарга байхдаа алдарт ТЭДС /Тариалан Эрхлэлтийг Дэмжих Сан/- гаас 1.2 тэрбумын зээл авсан асуудлаар “Зариг”-ийн Өнөрөөд асуугдаж явсан түүхтэй. Тодруулбал, нөхөр Д.Тэрбишийнх нь “Дөлгөөн-Оргил” компани уг сангаас зээл авсан асуудал үүсэж ажлаа өөрийн хүсэлтээр өгч байв. Улс төрд орно, сонгуульд өрсөлдөнө гэдэг байдгаа ухуулахын нэр. Энэ асуудал л босож ирэхгүй бол өөр асуудалгүй кандидат. Нөхөр, 2 хүүхдийн хамт амьдардаг.
