Нүүрсний сонсгол: Б.Ганхуяг ам нээвэл МАН-ынхан бүгд нүүрсний хулгайч болно
Нүүрсний хулгайн хэргээр хоригдоод жил орчим цагдан хоригдож буй Эрдэнэс Тавантолгой” ХК-ийн гүйцэтгэх захирал асан Б.Ганхуяг өнгөрсөн хугацаанд Нүүрсний сонсголд оролцох хүсэлтээ бүхэл бүтэн долоон удаа илэрхийлсэн байдаг. Гэвч эцэст нь шүүх Б.Ганхуягийн гэм буруутай эсэх нь эцэслэн шийдэгдээгүй байгаа учраас сонсголд оролцуулах боломжгүй гэсэн хариу өгсөн гэдэг билэг тэмдэг төдий шалтгаар сонсголд оролцуулахгүй өнгөрч байгаа нь юу өгүүлнэ вэ?
Б.Энхбаяр сайд хүсвэл Б.Ганхуяг байтугай Галдан мээрэнг ч сонсголд гэрчээр дуудах эрх мэдэл бий. Учир нь Шүүхийн шийдвэр биелүүлэх газар шууд ХЗДХЯ-ны харьяаны байгууллага. Сайд нь тушаал өгөхөд үгүй гэх хүн бий гэж үү. Тэр битгий хэл Хөгжлийн банкны шүүх хуралд ял эдэлж байсан Б.Махбалыг хуягласан хамгаалалттай авчирч оролцуулж байсан хэрэг явдал саяхных. Гэтэл Б.Ганхуяг нэгд, өөрөө 7 удаа хүсэлт гаргасан, хоёрт, гэм буруу нь эцэслэн тогтоогдоогүй байгаа субьект. Тэгэх тусмаа үнэхээр л нүүрсний хулгайгаа илрүүлэх гээд байгаа юм бол чухамдаа нэн түрүүнд Б.Ганхуягийг сонсголд оролцуулж, байцаах ёстой. Эндээс МАН нүүрсний хулгай, нүүрсний сонсголоор шоу хийж байгаа болохоос яг хэрэгтэнг олох хүсэл хэнд ч байхгүйгээр барахгүй Б.Ганхуяг тэргүүтэй жараахайнуудаар туг тахьчихаад ард нь хэргээс мултарч үлдэх хүсэлтэй гэмтнүүд МАН-аар дүүрэн байгааг харж болно. Өөрөөр хэлбэл тэдний хувьд Б.Ганхуяг бол тэсрэх бөмбөг нь болжээ.
МАН-ын өмнөх үеийнхний тэсрэх бөмбөг нь Т.Бадамжунай байсан. Тэрээр харвалт өгч ярих чадвараа алдсан. Ах нар тайвширсан. Харин Б.Ганхуяг бол яг өнөөдөр эрх барьж буй МАН-ынхны тэсрэх бөмбөг. Тийм ч учраас Б.Ганхуягийг сонсголд оролцуулахгүй байх, амыг барих сонирхол дээр олон хүний эрх ашиг нэгдэж буй. Хэрэв тэр ам нээвэл, 512 хуудас материалыг авч хэлэлцвэл МАН-ын өнөөгийн кадрууд хуйгаараа нүүрсний хулгайч болно. Ар гэрийнхнийх нь мэдэгдээд байгаа Б.Ганхуягийг хүнцэлээр хордуулсан гэдэг яриа үнэний ортой болов уу. Бүхнийг цаг хугацаа харуулна.
