“E-business платформд процессын дахин инженерчлэл хийх төсөл”-ийг хэрэгжүүллээ
Бизнесийн орчинд нэн шаардлагатай төрийн үйлчилгээнүүдийг цахимжуулах чиглэлээр ЦХХХЯ өнгөрсөн хугацаанд ажиллаж, жил гарны өмнө аж ахуйн нэгж, байгууллагуудад зориулсан e-business платформыг үйлчилгээнд нэвтрүүлсэн.
E-business платформ нь жилийн хугацаанд өнөөгийн хууль эрхзүйн орчинд цахимжуулах боломжтой 780 төрийн үйлчилгээг цахимжуулж, 33,750 хэрэглэгчид нийт 118 мянга 400 орчим үйлчилгээг цахимаар үзүүлсэн байна. Гэсэн хэдий ч аж ахуйн нэгж байгууллагуудын цаг, зардлыг хэмнэх өндөр ач холбогдолтой бүртгэл болон бусад үйлчилгээг цахимжуулахад төрийн институтийн уялдаа, процесс, хууль эрх зүйн асуудлууд тулгамдаж байна.
Энэхүү нарийн техникийн болон зохион байгуулалт, системийн асуудлыг олон улсад бизнес процесс дахин инженерчлэлийн арга зүйгээр шийдвэрлэдэг бөгөөд Азийн хөгжлийн банкны санхүүжилттэйгээр ЦХХХЯ “E-Business платформд процессын дахин инженерчлэл хийх төсөл”-ийг хэрэгжүүллээ.
Төслийн хүрээнд хуулийн этгээдийн бүртгэлтэй холбоотой Улсын бүртгэлийн багц хууль болон холбогдох бусад хуулийн хэрэгжилтийн явцад дүн шинжилгээ хийлээ.
Мөн хуулийн зорилт хангагдаж буй эсэх, Засгийн газрын цахим шилжилтийн бодлого хэрэгжих явцад тулгарч буй бэрхшээл, түүний шалтгаан, нөхцөлийг тодорхойлсон юм. Улмаар хуулийн этгээдийг бүртгэх, өөрчлөлт оруулах төрийн үйлчилгээг цахим хэлбэрээр үзүүлэхэд хууль хоорондын уялдаа холбоог хангахад шаардлагатай судалгааг хийж, хууль эрх зүйн болон техникийн санал шийдлийг гаргаж байна.
