Нэр дэвшигч-2024: Хотын орлогч П.Сайнзориг Сонгинод нэр дэвшинэ
“Хоёрдугаар Нямбаатар” гэгдэх болсон хотын нэгдүгээр орлогч “пороро” П.Сайнзориг Сонгинохайрхан дүүрэгт нэр дэвшинэ гэдгээ зарлаад удаагүй байна. 10 гаруй жил хуулиар мэргэшиж, олон томоохон хуулийн төсөлд гар бие оролцсон тэрээр сонгуульд хүч үзэх цаг нь болсон гэж үзсэн бололтой. ХЗДХЯ-ны Төрийн нарийн бичгийн дарга байхаасаа суурьтай улстөрч, ажилд махруу нэгэн гэдгээ харуулаад амжсан тэрээр Цахимын багц хуулиуд болон ХЗДХЯ-наас өргөн барьсан хэд хэдэн томоохон хуулиудыг гардан ажилласан байдаг. Тиймдээ ч хаадын хаан Х.Нямбаатарын овоо хараанд онилогдсон болов уу, тэрээр Хотын дарга болмогцоо П.Сайнзоригийг нэгдүгээр орлогчоороо авсан. Өдгөө Сонгинохайрханд нэр дэвшихээр болсон нь мөн л Х.Нямбаатарын нөлөө болов уу.
Мань эр зүгээр ч нэг төрийн хар хүн биш. Харизмтай, шуугиан дуулиан ихтэй этгээд. Бөхчүүдийн допингийн асуудал, “нүүрсний хулгай”-н БЭТ, “Оюутолгой”-н хөрөнгө оруулагчидтай хэлэлцээ ажлын хэсгийн ахлагч гээд явж өгнө. Хошин урлагийнхныг алиа салбадайгаар нь дуудаад жагсуулаад авсан ч түүхтэй. Сүүлд сэтгүүлчийн асуултад галзуураад байгаач гэдэг нь бараг хит.
Намтар түүх сөхвөл тэрээр Отгонтэнгэр их сургууль, Австралийн Нью Сайд Уэльсийн их сургуулийг хуульч мэргэжлээр төгсжээ. 2006 оноос БОАЖЯ-д ажиллан, 2016 онд ХЗДХЯ-ны Хууль эрх зүйн бодлогын газрын дарга, 2022 онд ХЗДХЯ-ны Төрийн нарийн бичгийн дарга болтлоо дэвшин ажилласан. Ийм нэг товчхон намтартай ч, ажлаа мэддэг ааштай орлогч Сонгины нэр дэвшигчдийг өнгөлөх нь.
