Ш.Адьшаа ба Ховдын тойрог цэвэрлэгээ
Нүүрсний сонсгол том түвшиндээ МАН-ын дарга Л.Оюун-Эрдэнийн тойргийн цэвэрлэгээ, ХЗДХ-ийн сайд Б.Энхбаярын хувьд хувийн өс хонзонгоо авах талбар болоод өнгөрөх нь нэгэнт тодорхой болж байна. Эхний сонсголоор “Ажнай” тэргүүтэй Ардчилсан намынхныг баахан баалж шүүсэн. Хоёр дахь сонсголын эхний хэсгийн гол баатрууд мөн л АН-ынхан буюу тодруулбал УИХ-ын гишүүн Ш.Адьшаа, А.Адьяасүрэн нар байсан. Энэ хоёр хүн баахан жолооч тэврийнхэн болон хил, гаалийнхантай нийлж аваад хулгайд алдагдсан гээд буй нүүрсийг хилээр гаргачихсан юм байх.
А.Адьяасүрэн гишүүний тухайд олон жил нүүрс тээврийн чиглэлд бизнес, ажил хэрэг эрхэлж ирсэн. Хятадуудтай ч нэлээн хүзүү сээрээрээ холбогдсон гэдэг. Хэрэг нь АТГ дээр шалгагдаад прокурорт шилжсэн гэдгээс үзвэл хийсэн гэм буруу байж болох. Харин Ш.Адьшаа гишүүний тухайд анхны 17 дотор нэр нь дуулдсан ч АТГ дээр хэрэг үүсгэгдэж шалгагдсан нь үгүй. Харин сонсголын үеэр өөрийнх нь хэлснээр олны өмнө шүүгдсэн нь нэг талаар Б.Энхбаяр сайдын хувийн өс хонзон нөгөө талаар Ховдын тойрогт өнгөрсөн сонгуулиар хол тасархай гарч ирсэн түүнийг замаас зайлуулах ажиллагаа гэж үзэж болохоор. Тодруулбал, Б.Энхбаяр сайд Ш.Адьшаа гишүүний мөнхийн дайсан, тойргийн өрсөлдөгч С.Бямбацогтыг ХЗДХ-ийн сайдаар ажиллаж байх үед Төрийн нарийнаар нь ажиллаж байсан. Улс төрийн хүрээнд түүнийг С.Бямбацогтын захиалгаар хуулийн “хулгай, алуур” хийдэг хөлснийх нь хүн гэх яриа явдаг. Тийм ч биз. Үгүй ч биз. Энэ өнцгөөс нь харвал Ш.Адьшаа гишүүний хэлсэнчлэн Б.Энхбаяр хувийн өс хонзонгоо авсан байхыг үгүйсгэх аргагүй.
Харин том зургаараа бол ш.Адьшааг олны өмнө бүлтэлзүүлж, нүүрсний хулгайч мэт харагдуулах нь хэнд ашигтай байж болох вэ?
Магад Ерөнхий сайд Л.Оюун-Эрдэнэ өөрсдийн хүмүүстээ зориулж тойргийн цэвэрлэгээ хийсэн байж болох уу? Өөрөөр хэлбэл Ховд аймгийн Засаг дарга Э.Болормаа, МАН-ын гадаад харилцаа хариуцсан нарийн бичгийн дарга О.Батнайрамдал хоёр хоёулаа Л.Оюун-Эрдэнийн фракц. Хоёулаа Ховдын тойргоос сонгуульд өрсөлдөхөөр зэхэж буй. Тэдэнд Ш.Адьшаа нүүрсний хулгайч биш ч гэлээ нүүрсний хулгайч мэт харагдах сөрөг имиж нэмэх оноо авчирна.
