Нэр Дэвшигч-2024: Н.Учралд оногдсон учиртай ачаа
Бурхан хүнд даах хэрээр нь ачаа үүрүүлдэг гэх. Цахим хөгжил, харилцаа холбооны сайд Н.Учрал хоёронтоо УИХ-д сонгогдохдоо хамгийн залуу, хамгийн буурьтай, хамгийн орчин үелэг гишүүн гэгдэж яваад нэг л өдөр үхэл амьдралтай нүүр тулж, хагас жил хэвтэрт байсны эцэст босч ирсэн. Чухамдаа үхээд амьдарсан гэдэг үг түүнд яг тохирно. Эргэж ирсэн минь ном нь бол тэр чигээрээ залуу хүний романтизм дүүрэн.
Амьдрал түүнд үхэл, амьдралтай тэнцэх сорилт тулгасан шиг МАН мөн л хүнд ачаа үүрүүлсэн нь дасаж ээнэгшсэн Сонгинохайрханаас нь мулталж Сүхбаатар дүүргийн МАН-ын хороог даатгаж өгсөн. Энэ нь томорсоор тэрээр энэ сонгуульд Сүхбаатар-Чингэлтэйг сонгуульд авч орно. Өөрөөр хэлбэл МАН-ын тухайд хамгийн хүнд тойрог гэсэн үг. Сүхбаатар дүүрэгт өнгөрсөн орон нутгийн сонгуулиар АН ялалт байгуулж, дүүргийг цэнхэр талынхан удирдаж буй. Чингэлтэй хоёр ч гишүүнийхээ бүгд найрамдахыг уншуулсан. Т.Аюурсайхан “аавынд” морилсон бол Ж.Сүхбаатар алдарт ногоон автобусны хөл дээрээс болж жаахан л эвгүйтвэл араас нь явахад бэлэн буй. Байгаа ганц гишүүн нь “боов” М.Оюунчимэг. ийм гал ассан тойрогт намаа авч орно гэдэг хүнд ачаа, чангахан сорилт байхаас яахав. Гэхдээ ах нам чухамдаа Н.Учралыг л чадна гэж илгээсэн гэдэг.
Хаа очиж “Их засаг”-ийн Н.Ням-Осорын ганц хүү, амандаа алтан халбага зууж төрсөн, боловсролтой бол боловсролтой, мөнгө бэлтэй бол мөнгө бэлтэй кандидат юм даа. Дээр нь Цахим хөгжил, харилцаа холбооны яам нь байна. үзэлцээд байж дээ Н.Учрал минь.
