Сүгийн фракц Б.Батдаваагаар, Хүүкийн фракц М.Ганбаатар, Ц.Пүрэвхүү нараар туг тахилаа

Нүүрсний сонсголын эхний өдрийн гол гурван баатрын хоёр нь АН-ынх, нэг нь МАН-ын угшилтай ҮСХ-ны дарга Б.Батдаваа байсан. Б.Батдаваагийн тухайд Сү.Батболдын хамаатнаар зогсохгүй Дундговьд нэр дэвшихээр зэхэж байсан. Нүүрсний хулгай нь илрээгүй бол 2024 оны МАН-аас нэр дэвших нэр цэвэр, цус цэвэр шижгэр залуусын нэгээр нэрлэгдэх байв. Гэвч эцсийн бүлэгт туг тахигдсан нь юуных вэ?

Өөрийгөө улсын яллагч болсон мэт аашилж буй Б.Энхбаяр улс төрийн угшлаараа бол Сү.Батболдын фракц. Сү хэзээнээсээ аль ч төрд, ямар ч фракц ноёлсон бай тал алдаж яваагүйгээрээ супер улс төрч. Супер фракцийн ахлагч. Ямартаа л Л.Оюун-Эрдэнэтэй хүртэл үг хэлээ олчихсон, хүзүү сээр, эрх ашгаараа холбогдчихсон, үр дүнд нь Б.Энхбаярыг ХЗДХ-ийн сайдаар томилуулж чадсан. Ингэсэнээр Сүгийн фракц ахин хүчийг аваад буй гэх яриа улс төрийн хүрээнд яригдах болсон. Б.Энхбаяр Нүүрсний сонсгол дээр Л.Оюун-Эрдэнэтэй маш нягт хамтран ажиллаж буйгаас үүнийг уншиж болно.

Гэхдээ хичнээн супер байлаа гээд бүх юмнаас хуурай гараад байж болохгүй. Том эрх ашгийн төлөө жижиг жараахайгаа золиосолж болно. Сүгийн фракц энэ удаад Б.Батдаваагаараа туг тахиж, өргөл өргөв.

Ганц Сү ч биш Хүүкийн фракц “по” М.Ганбаатар, утааны Ц.Пүрэвхүү хоёроороо туг тахисан бол хотын фракц буюу Миеэгийнхэн Ж.Мөнхбат, Ё.Баатарбилэг хоёроо золионд явуулсан билээ. Энэ мэт нүүрсний хулгайд зөвхөн АН-ынхан холбогдсон юм шиг харагдуулахгүйн тулд фракц бүлэглэл бүр нэг, нэг хүнээрээ туг тахиж энхрий хайрт намдаа эгнэгт үнэнч гэдгээ харуулж байна.