УИХ-ын 2024 оны сонгуульд өрсөлдөх нэр дэвшигчид өнөөдөр тодорно

УИХ-ын 2024 оны сонгуульд өрсөлдөх нэр дэвшигчид өнөөдөр тодорно. Тиймээс нам, эвслүүдийн удирдах түвшнийхэн өнөөдөр хуралдаж нэр дэвшигчдээ эцсийн байдлаар тодруулна. Тухайлбал,

МАН-ын Удирдах зөвлөлийн хурлаа 09.00 цагт намын Бага хурлаа 14.00 цагт товложээ. Удирдах зөвлөлийн хуралдаанаар УИХ-ын 2024 оны сонгуульд нэр дэвшигчид болон намын жагсаалтад орох нэрсийг эцэслэх бөгөөд Бага хурлын гишүүдийн олонхын саналаар тодруулах юм.

Ардчилсан намын Улс төрийн зөвлөл 12.00 цагт, Үндэсний бодлогын хороогоо 16.00 цаг хуралдуулахаар төлөвлөсөн байна.

Мөн ХҮН намын Удирах зөвлөл өглөө хуралдуулж, Их хурлаа үдээс хойш товложээ.

Үндэсний эвслийн Удирдах зөвлөл 10.00 цагт хуралдаж, эвслийн хурлаа 14.00 цагт товлоод байна.

Харин бие даагчид тойргийнхоо 801 дэмжигч сонгогчийн гарын үсгийг өнөөдөр цуглуулж дуусгана. 

Түүнчлэн нэр дэвшигч хуульд заасан нэр дэвшүүлэх ажиллагаа дууссанаас хойш гурав хоногт багтаан нэр дэвшигчийн хөрөнгө, орлогын мэдүүлгээ АТГ-т мэдүүлэх учиртай. Харин АТГ нийт нэр дэвшигчид хөрөнгө орлогын мэдүүлгээ мэдүүлсэн эсэх талаарх лавлагааг хуулийн тавдугаар сарын 24-ний дотор СЕХ-нд хүргүүлэх юм. 

Ингээд нам, эвсэл бие даагчид тавдугаар сарын 25-наас өмнө нэр дэвшигчийн баримт бичгийг СЕХ-нд хүргүүлнэ. Харин СЕХ нэр дэвшигчийн баримт бичгийг хүлээн авах хугацаа дууссанаас долоо хоногийн дотор бүртгэх эсэх асуудлыг шийдвэрлэж, тогтоол гаргана. Өөрөөр хэлбэл, зургаадугаар сарын 1-ний дотор нам эвслийн нэр дэвшигчид, бие даагчдыг бүртгэх эсэх асуудлыг шийдвэрлэнэ.