Нэр дэвшигч-2024: 2-р тойрог дахь будилааны эзэн Б.Баярсайхан

Улаанбаатар хотын уугуул, тэр дундаа Төмөр замд хүүхэд насаа өнгөрүүлсэн Б.Баярсайхан 2-р тойрогт нэр дэвшин давхиж явна. УБДС-ийг найрал дуучнаар төгссөн түүнийг дууны урлагаас улс төрөөр амьсгалсан хүн хэмээн С.Жавхлантай зэрэгцүүлэн дооёолж байсан цаг саяхан.

УБДС-ийг төгссөнийхөө дараа МУИС-ийг төгссөн ч гэдэг ч юуны анги төгссөн нь тодорхойгүй. Харин дараа нь Монголын хэвлэлийн хүрээлэнгийн дэргэдэх сэтгүүл зүйн курсийг төгссөн байдаг. Түүнчлэн 1999 онд BBC телевиз өргөн нэвтрүүлгийн сургалт, мөн онд багтаж Израйлийн Гадаад хэргийн яамны сургалтын төв, 2000 онд Ирландын Дублины англи хэлний сургууль, 2002 онд АНУ-ын Вашингтоны үндэсний их сургууль, 2004 онд Монгол Улсын Удирдлагын институт, 2012 онд АНУ-ын Удирдлагын институт дүүргэсэн гэхчилэн түүний намтар хөвөрнө. Гэхдээ сургалт уу,дамжаа юу гэдэг нь тодорхой бус.

Тэрбээр 2020 оны УИХ-ын сонгуулийн 9-р тойрог буюу Завхан аймгаас нэр дэвшиж, парламентад анх удаа хөл тавьсан. УИХ-ын гишүүнээр сонгогдсоныхоо дараа тойрогтоо анх удаа ажиллахдаа "цэрэг" хувцас өмсөж, Завхан аймгийн Засаг дарга нарыг загнаж зандчиж үүрэг даалгавар өгсөн байдаг. Албан тушаал, сэнтийгээ андуурсан Б.Баярсайхан ингэж олны шүүмжлэлийг хүртсэн удаатай. Гишүүн болохоосоо өмнө 2016-2020 онд Боловсрол, шинжлэх ухааны яамны Төрийн нарийн бичгийн дарга, сайдын зөвлөхөөр ажиллаж байв.