Сонсгол: "МАК" ХХК байгуулагдсан цагаас хойш бусдын лицензтэй орд дээр түрээсээр ашиглаж ирсэн"

Ашигт малтмал хайх, ашиглах зориулалтаар газар, түүний хэвлийг тусгай зөвшөөрлөөр олгох, төлбөр, татвар ногдуулах, хураахтай холбоотой үйл ажиллагаанд хяналт шалгалт хийх” үүрэг бүхий Хянан шалгах түр хорооноос зохион байгуулж буй нотлох баримтыг шинжлэн судлах нээлттэй сонсгол хоёр өдөр үргэлжилж дууслаа. 

Ашигт малтмалын лиценз олголт, АМНАТ-ийн талаарх нотлох баримтыг нээлттэй шинжлэн судлах сэдвийн хүрээнд ашигт малтмалын лиценз эзэмшдэг  хүмүүс гэрчийн мэдүүлэг өгсөн юм. 

Тухайлбал стратегийн ордын асуудлаар Б.Нямтайшир тайлбар хийлээ. 

Тэрбээр "МАК" компани 30 гаруй жилийн түүхтэй. 1993 оны 12-р сард байгуулагдсан цагаас хойш уул уурхайн үйлдвэрлэлийг бусдын лицензтэй орд дээр түрээсээр ашиглах байдлаар ажиллаж ирсэн. Өөрөөр хэлбэл, лицензгүй байсан гэсэн үг. Мөн тухайн үеийн хуулиар эрэл хайгуулын талбайг сайтар судалж, өргөдлийн байдлаар лицензүүдээ авч байсан.

Групп компани нийт 4500 гаруй ажилтантай, 1 их наяд гаруй төгрөгийг улсын төсөвт төлсөн. Жил бүр шилдэг татвар төлөгчдийн эхний 10-т багтдаг. Орон нутгийн хөгжилд ч багагүй хөрөнгө оруулалт хийсэн. Тухайлбал, Өмнөговь аймгийн гурван сумыг эрчим хүчээр хангаж байна" гэх хариултыг өгсөн юм.