Нэр дэвшигч-2024: 2-р тойрогт АН-аас өрсөлдөгч “ТЭСО”-гийн О.Цогтгэрэл
Увс бол АН-д халтай тойрог. Цэнхэртэх дургүй улаарсан уг тойргийг цэнхэртүүлэхээр 2016 оноос зүтгэж, 2000 онд ялалт байгуулан гарч ирсэн хүн бол “ТЭСО” корпорацийн гэх тодотголтой О.Цогтгэрэл. Ялалт байгуулахад нь ч “Ардаа том корпорацитай тулдаа мөнгөөр зодож гарч ирлээ” гэж шуугицгаасан. Тэрбээр улстөрд орох замналаа 2012 онд Н.Алтанхуягийг Ерөнхий сайд болсны дараа зөвлөхөөр нь ажиллаж эхлүүлсэн. Удалгүй Увс аймгийн АН-ын дарга ч болсон билээ. Гэхдээ энэ албыг удаан хашиж чадаагүй.
Ердөө гурван жил хашаад чөлөөлөгдсөн юм. О.Цогтгэрэл 1998 онд ТИС-ийн Компьютерын техник менежментийн сургуулийг дүүргэсэн бөгөөд мөн эдийн засагч мэргэжилтэй. 2020 оноос УИХ-ын гишүүн болж, 2022 оноос УИХ дахь Ардчилсан намын бүлгийн даргаар ажиллаж буй. Тэрбээр хоёрдугаар курсын оюутан ахуйгаасаа бизнес хийхээр оролдож, 2003 онд “ТЭСО”-гоо байгуулж, компанийнхаа гүйцэтгэх захирал, ТУЗ-ийн дарга хийж, 2015 оноос Ерөнхийлөгч гэж дуудуулж иржээ. Хүнсний үйлдвэрлэл, гадаад худалдаа, тээвэр зуучлал, барилга, уул уурхай зэрэг нийт 10 гаруй охин компанитай ч болж амжсан байна.
