Л.Оюун-Эрдэнэ таван удаа мэтгэлцээнд дуудагдсан ч хамраа ч цухуйлгасангүй
Ерөнхий сайд Л.Оюун-Эрдэнийг таван удаа мэтгэлцээнд дууджээ. Найман жил засагласан эрх баригч намын дарга гэдэг утгаар нь түүнтэй олон ч нэр дэвшигч мэтгэлцэхийг хүсэж байна. Хамгийн анх Комедиан Д.Амартүвшин, иргэн Д.Монголхүү нар “Ковидын үеийн бодлого”-оор мэтгэлцээнд дуудсан. Үргэлжлүүлэн түүнийг АН-аас нэр дэвшигч Ж.Батзандан “Шударга 5”-ын амлалт, Ерөнхийлөгч асан Ц.Элбэгдорж “С.Зоригийг хөнөөсөн хэрэг”-ээр мэтгэлцээнд дуудаж байв.
Харин сонгуулийн жил эхэлснээс хойш “Үндэсний Эвсэл”-ийн тэргүүн Н.Номтойбаяр ирээдүйн хөгжлийн бодлогын асуудлаар Ерөнхий сайдыг мэтгэлцээнд дуудсан юм. Тэрбээр УИХ-ын сонгуулийн мөрийн хөтөлбөрөө хүлээлгэн өгөхдөө ч 2050 бодлогод алдаа, дутагдал байгааг дурдаад засаж, залруулах хэлэлцүүлэг зайлшгүй хийх ёстой гэж байв.
Мөн Л.Оюун-Эрдэнийг Ч.Лодойсамбуу саяхан “Сүүлийн 8 жил” гэсэн сэдвээр мэтгэлцээнд дууджээ. Гэсэн ч Л.Оюун-Эрдэнэ хамраа ч цухуйлгасангүй. Гарч ирээд зоригтойхон дуугарч чадахгүй байгаа учрыг нь намын гишүүд нь ч ойлгож чадахгүй байгаа гэх.
Тэрээр айж, гүлдийсээр ганц ч удаа мэтгэлцэлгүй сонгуулийн сурталчилгааны хугацааг дуусгах бололтой. “Цагтаа цалгиж явсан юм” гэгчээр Л.Оюун-Эрдэнэ 2017 онд Ерөнхийлөгчийн сонгуулийн үеэр “Мэтгэлцээнийг 3-4 үе шаттай сонгодог утгаар нь хийх соёл тогтох нь л чухал...”, “Мэтгэлцээн шахаад хийчих л дээ. Цаашдаа сайн засаглалд чухал соёл тогтоно. Бусад аль ч сурталчилгаа утгаа алдана” гэх зэргээр жиргэж байжээ. Уриалан дуудсан улс төрийн соёл нь Ерөнхий сайд болсных нь дараа дашийн шог болсон юм даг уу даа.
