УИХ-ын сонгуулийн 1 дүгээр тойрогт нэр дэвшигч Г.Сайханбаяр намын шийдвэрээ сөрж сурталчилгаагаа үргэлжлүүлж байна

Өвөрхангай аймгийн Сант сумын 5 дугаар багт тус сумын АН-ын дарга Б.Баянмөнх нь МАН-ын сонгуулийн ухуулагчаар ажиллаж байсан П.Отгонбаатар гэгчид зодуулж амиа алдсан хэрэг өнгөрөгч бямба гараг /2024.06.15/-т гарсан. П.Отгонбаатар нь УИХ-ын 1 дүгээр тойрогт МАН-аас нэр дэвшигч Г.Сайханбаярын ухуулагчаар ажиллаж байсан юм. 

Иймд Г.Сайханбаярыг нэр дэвшигчээс татаж буйгаа МАН-ын Ерөнхий нарийн бичгийн дарга Д.Амарбаясгалан мэдэгдсэн байдаг. Харин Г.Сайханбаяр тус мэдэгдлийн эсрэг "Миний нэр таталттай холбоотой асуудал хуультай. Тодруулбал, нэр дэвшигч нас барсан тохиолдолд болон шүүхийн хүчин төгөлдөр шийдвэр гарсан тохиолдол л нэр дэвшигчийн нэрийг татна. Сонгуулийн сурталчилгаандаа үргэлжлүүлэн оролцож, өрсөлдөнө" гэж байр сууриа илэрхийлсэн. Улмаар сурталчилгаагаа зогсоогоогүй, үргэлжлүүлэн явуулж байна. Тухайлбал СЕХ-нд хүргүүлсэн МАН-ын нарийн бичгийн даргын хүсэлт эцэслэн шийдвэрлэгдээгүй учир сурталчилгаагаа үргэлжлүүлж буй хэрэг.