Unread 100: Changemakers-т багтсан “Үндэсний Эвсэл”-ийн гишүүд хэн байв

Unread Media айсуй арваны хөгжлийг түүчээлж, өнгийг тодорхойлох шинэ цагийн улс төрчид, шилдэг өөрчлөлт бүтээгчдийг танилцуулах “Unread 100: Changemakers”-ийг толилууллаа. Энд багтсан 100 эрхэм бүгд өөр өөрийн замналаар өөрчлөлтийг бүтээж буйг гэдгийг Unread Media онцолжээ.

Мөн "Unread 100: Changemakers"-ийг гаргахдаа Unread Media-ийн редакц хараат бусаар, бие даан гаргажээ. Тэгвэл эдгээр 100 эрхэмд “Үндэсний Эвсэл”-ээс таван нэр дэвшигч багтсан байна.

1. Нямтайширын Номтойбаяр – “Үндэсний Эвсэл”-ийн тэргүүн

Улс төрийг эрүүлжүүлж, намчирхал, талцал хуваагдлыг зогсоохын төлөө улс төрийн шинэ хүчнийг тэргүүлэн эргэн ирснээр Нямтайширын Номтойбаяр энэ сонгуулийн гол дүр болоод буй. Төрийн толгойд гарсан авлигачдыг ноцож, үнэн нүүрийг нь илчилж байгаа түүний тэмцэл ойрын өдрүүдийн улс төрийн амьдралыг тодорхойлж байна.

Н.Номтойбаяр нь 2012-2016, 2016-2020 онд Монгол Улсын Их хурлын гишүүнээр сонгогдон ажиллаж байсан. 2013-2016 онд Монгол Улсын Их Хурал дахь Монгол Ардын Намын бүлгийн Дэд дарга, 2016-2017 онд Монгол Улсын Хөдөлмөр, Нийгмийн хамгааллын сайдын албыг хашиж байв.

2001 онд АНУ-ыг Индиана мужийн Валпарайсо Их сургуулийг улс төрийн шинжлэх ухаан, бизнесийн хос мэргэжлээр бакалавр, 2010 онд “HTW Berlin” Их сургуулийг Бизнесийн удирдлага, инженерийн чиглэлээр магистрын зэрэгтэй төгссөн. 2022 онд Английн Кембрижийн Их сургуулийн Удирдлагын хөтөлбөр, 2023 онд Оксфордын Их сургуулийн Удирдлагын хөтөлбөрийг тус тус дүүргэжээ. Тэрээр 2024 оны УИХ-ын сонгуульд “Үндэсний Эвсэл”-ээ тэргүүлж, жагсаалтын нэгдүгээрт бичигдэж байна.

2. Отгоны Батхүү – Хуульч

Отгоны Батхүү нь МУИС-ийн Хууль зүйн сургуулийг хуульч мэргэжлээр төгссөн. “Зоос банк”, “Эрдэнэс Тавантолгой” компаниудад хуульч, “Ашигт малтмал, газрын тосны газар”-т ахлах мэргэжилтэн, “Монгол газрын тос боловсруулах үйлдвэр” ТӨХКК-д Захиргааны хэлтсийн дарга, Дэд захирлаар ажиллаж байсан туршлагатай. Тэрээр 2024 оны УИХ-ын сонгуульд “Үндэсний Эвсэл”-ийн жагсаалтын долоодугаарт бичигдэж байна.

3. Отгоны Мөнхзаяа - "Гранд серкл" Корпорацын Ази, Номхон далайн бүсийн Бизнесийн захирал

Отгоны Мөнхзаяа нь Хүмүүнлэгийн ухааны Их сургуулийг 2001 онд англи, орос хэлний багш, Шихихутуг Их сургуулийг 2017 онд эрх зүйч мэргэжлээр төгөөд 2022 онд АНУ-ын Жорж Вашингтоны Их сургуульд олон улсын хүний эрх зүй мэргэжлээр магистрын зэргээ хамгаалсан.

Францын “Өлсгөлөнгийн Эсрэг Хөдөлгөөн”, “Мерси Кор” зэрэг олон улсын байгууллагад ажиллаж байсан туршлагатай. Өдгөө АНУ-ын "Гранд Серкл" корпорацын Ази, Номхон далайн бүсийн Бизнес хариуцсан захирал болон “Залуу бизнес эрхлэгч эмэгтэйчүүдийн холбоо”-ны Говийн бүсийн дэд тэргүүний албыг хашиж байна. Тэрээр 2024 оны УИХ-ын сонгуулийн 7 дугаар тойрогт “Үндэсний Эвсэл”-ээс нэр дэвшиж байна.

4. Цэрэндоржийн Дагвадорж - "Малын гаралтай тос үйлдвэрлэгчдийн холбоо"-ны Гүйцэтгэх захирал

Цэрэндоржийн Дагвадорж нь ШУТИС-ийг тээврийн удирдлагаар бакалавр, олон улсын бизнесийн удирдлагын чиглэлээр магистр зэрэгтэй төгссөн. Малын гаралтай өөр тос боловсруулах чиглэлд 2014 оноос судалгаа хийж, 2019 оноос “Хотол констракшн” компанийн Гүйцэтгэх захирлаар ажиллаж буй. Тус компани нь малын түүхий эдийн хаягдлыг бууруулах, түүнийг дахин боловсруулах үйлдвэрийг бүтээн байгуулахаар зорьж байгаа юм. Тус үйлдвэр нь саван, тослох материалын түүхий эдийг боловсруулж, Хятад, Казахстан, Узбекистаны зах зээлд гаргахаар бэлтгэж буй. Тэрээр 2024 оны УИХ-ын сонгуулийн 1 дүгээр тойрогт “Үндэсний Эвсэл”-ээс нэр дэвшиж байна.

5. Намсрайжавын Энхчимэг - “BASU” брэндийн үүсгэн байгуулагч 

Намсрайжавын Энхчимэг нь 2005 онд СЭЗДС-ийг банкны удирдлага, менежментийн чиглэлээр төгсөж, 2011 онд Удирдлагын академид төрийн удирдлага, 2015 онд Австралийн Сиднейн Их сургуульд олон улсын бизнесийн чиглэлээр магистрын зэргээ тус тус хамгаалсан. Үүсгэн байгуулсан спорт хувцасны “BASU” брэндээ удирдахын зэрэгцээ Баянгол дүүргийн Иргэдийн хурлын төлөөлөгчийн албыг хашиж байна. Тэрээр 2024 оны УИХ-ын сонгуулийн 9 дүгээр тойрогт “Үндэсний Эвсэл”-ээс нэр дэвшиж байна.