УИХ-ын 2024 оны сонгуулийн санал хураалт маргааш болно
УИХ-ын 2024 оны сонгуулийн санал хураалт авах өдөр маргааш болох байна. Энэ удаагийн сонгуулиар санал өгөх насны 2.2 сая иргэн байгааг Улсын бүртгэлийн ерөнхий газраас мэдээлсэн.
Энэ удаагийн УИХ-ын сонгуулиар парламентад анх удаа 126 гишүүнтэй болно. Тиймдээ ч Монгол Улсын Үндсэн хуульд 2023 оны тавдугаар сарын 31-ний өдөр УИХ-ын сонгуулийг холимог тогтолцоогоор явуулж УИХ-ын 78 гишүүнийг тойргоос, 48 гишүүнийг жагсаалтаар сонгохоор өөрчлөлт оруулж, баталсан юм.
Мөн энэ удаагийн сонгуулийн онцлох зүйл нь томосгосон тойрог. Тухайлбал, орон нутагт бүсчилсэн 7, нийслэл Улаанбаатарт 6, нийт 13 байхаар тогтсон. Үүнд:
- Архангай, Баянхонгор, Өвөрхангай аймгуудыг нэгтгэн 1-р тойрог
- Говь-Алтай, Завхан, Увс, Ховд аймгуудыг нэгтгэн 2-р тойрог
- Баян-Өлгий аймаг 3-р тойрог
- Булган, Орхон, Хөвсгөл аймгуудыг нэгтгэн 4-р тойрог
- Дархан-Уул, Сэлэнгэ, Төв аймгуудыг нэгтгэн 5-р тойрог
- Дорнод, Сүхбаатар, Хэнтий аймгуудыг нэгтгэн 6-р тойрог
- Говьсүмбэр, Дорноговь, Дундговь, Өмнөговь аймгуудыг нэгтгэн 7-р тойрог
- Баянзүрх дүүрэг 8-р тойрог
- Баянгол дүүрэг 9-р тойрог
- Сүхбаатар, Чингэлтэй дүүргүүдийг нэгтгэн 10-р тойрог
- Сонгинохайрхан дүүрэг 11-р тойрог
- Хан-Уул дүүрэг 12-р тойрог
- Багануур, Багахангай, Налайх дүүргүүдийг нэгтгэн 13-р тойрогт хуваасан.
Улсын хэмжээнд 13 тойрогт 78 гишүүнийг сонгох ба ингэснээр аймгуудаас 54, нийслэлээс 24 гишүүн сонгогдох юм.
УИХ-ын 2024 оны сонгуульд 19 нам, хоёр эвсэлээс гадна бие даан 42 нэр дэвшигч, нийт 1341 нэр дэвшигч өрсөлдөж буй. Тодруулбал, тойрогт 969 нэр дэвшигч, жагсаалтаар 372 нэр дэвшигч өрсөлдөж байгаа юм.
