СҮХБААТАР ДҮҮРГИЙН СЭЛБЭ НЭГДСЭН ЭМНЭЛЭГ АШИГЛАЛТАД ОРОХОД БЭЛЭН БОЛЛОО
Өнөөдөр дүүргийн ИТХ-ын төлөөлөгчид орон нутгийн төсвийн хөрөнгө оруулалтаар барьсан Сэлбэ нэгдсэн эмнэлгийн тохижилт, дотоод зохион байгуулалттай танилцав.
Монгол улсын хэмжээнд анх удаа Сүхбаатар дүүрэг орон нутгийн төсвийн хөрөнгө оруулалтаар Сэлбэ нэгдсэн эмнэлгийг барьж дууслаа. Сэлбэ нэгдсэн эмнэлэг нь дүүргийн 13 дугаар хороонд 2.2 га талбайд байрлах ба А, Б блок гэсэн 2 үндсэн хэсэг, техникийн туслах байраас бүрдсэн нийтдээ 12500м2 барилгын талбайтай.
Эмнэлгийн тусламж үйлчилгээ үзүүлэхэд зайлшгүй шаардлагатай 184 нэр төрлийн 2672 ширхэг тоног төхөөрөмж, компьютер техник, хэрэгсэл, эм эмнэлгийн багаж хэрэгслийг дүүргийн төсвөөр авч бэлэн байдлыг хангасан.
Сэлбэ Нэгдсэн эмнэлэг нь жилд дунджаар 11000 үйлчлүүлэгчийг дотор, мэдрэл, мэс засал, гэмтэл, хүүхэд, эмэгтэйчүүд, Монголын уламжлалт анагаах ухаан, сэргээн засах, хөнгөвчлөх болон хими эмчилгээг хэвтүүлэн эмчилж, 3000-3400 хүнд мэс заслын тусламж үзүүлж, амбулаторийн төрөлжсөн мэргэжлийн 21 кабинет, оношилгооны 8 кабинет, нэгдсэн лабораторын тусламж үйлчилгээг хоногт дундажаар 950-1000 орчим иргэдэд тусламж үйлчилгээ үзүүлэх хүчин чадалтай.
Сэлбэ Нэгдсэн эмнэлэг нь нийт хэвтүүлэн эмчлэх 200 ортойгоор үйл ажиллагааг явуулах ба үүнээс хүүхдийн тусламж үйлчилгээнд 40 ор байхаас 4 ор нь хүүхдийн эрчимт эмчилгээний, насанд хүрэгчдийн 160 орноос 6 ор нь хүлээн авах яаралтай тусламжийн ажиглалт тусгаарлах, 20 ор нь насанд хүрэгчдийн эрчимт эмчилгээний байхаар төлөвлөгдсөн.
