Анализ: “Херо” Б.Баатарын найруулгаар “Капитал” банкны А.Ариунболд гэнэт гарч ирж, ярьсны учир юу вэ?

Саяхан "Херо" Баатарын найруулсан шинэ жүжиг цацагдав. Хөтлөгч, оролцогчоосоо л шууд ингэж ойлгогдсон хэрэг. Сэтгүүлч М.Батбилэг асууж, "Капитал" банкны Гүйцэтгэх захирал асан А.Ариунболд буюу УИХ-ын гишүүн асан Б.Ундармаагийн нөхөр хариулж "тоглосон" тус нэвтрүүлэг төв телевизээр цацагдсан нь яавч санамсаргүй явдал биш буюу захиалгат пропаганда гэдэг нь тодорхой.

Тэртээ ковидын он жилүүдэд гарч байсан Мэдээллийн урсгал нэвтрүүлгээс авахуулаад сэтгүүлч М.Батбилэг Ерөнхий сайдын төрсөн ах “Херо” Б.Баатартай хүзүү сээрээрээ холбогдож эцэст нь өнгөрсөн УИХ-ын сонгуулийн үеэр түүний дуу хоолой, пропоганда болсон нь ил тодорхой болсон. Ямартаа л сэтгүүлч М.Батбилэг, түүхч Ч.Содбилэг нар "Херо" Б.Баатарын асар, басар гэгдэж байхав. Б.Баатарын найруулсан тавилтат, захиалгат жүжиг бүрийн хөтлөгчөөр хослон ажилласан нь ийн цоллогдоход хүрсэн хэрэг. Ч.Содбилэг С.Зориг агсны гэргий Б.Булгантай ярилцсан "тавилтат жүжиг" цацагдсаныг санаж буй бил ээ. Улмаар сонгуулийн дараа наймдугаар сард Ч.Содбилэг Умард Солонгосын ЭСЯ-ны дипломат ажилтнаар томилогдож, шагналаа хүртсэн билээ.

Энэ удаад А.Ариунболд гарч ирж байгаа нь яавч санамсаргүй хэрэг биш бөгөөд чухам хаашаа чиглүүлж шидсэн чулуу байв гэдэг л анхаарал татаж байгаа юм.

“Капитал" банкны хэргийг сануулбал, 2019 онд Монголбанкнаас Капитал банкийг албадан татан буулгасан. Уг банкны харилцагч 30 гаруй мянган иргэн 260 тэрбум төгрөгөөр хохирсон бөгөөд хохирогчдын 90 хувь нь 2017 онд хадгаламж нээлгэсэн тэтгэврийн насны иргэд байв. Төрийн данстай 340 орчим тэрбум төгрөг байршиж байсан. Үүнээс тэтгэврийн даатгалын сангийн 104, Эрүүл мэндийн даатгалын сангийн 136, Хөгжлийн банкны 52 тэрбум төгрөг тус тус байсан.

Эцэст нь шүүхээс А.Ариунболдыг "...банкийг төлбөрийн чадваргүй болгож их хэмжээний буюу 104.6 тэрбум төгрөгийн хохирол учруулсан" гэмт хэрэг үйлдсэн гэм буруутайд тооцсон ч, хоёр жилийн тэнсэн харгалзах ялаар шийтгэсэн. Харин Санхүү хариуцсан дэд захирал Б.Янжин, Зээлийн газрын дарга С.Дэлгэрцэцэг нарт холбогдох хэргийг хэрэгсэхгүй болгон цагаатгаж, шийдвэрлэсэн билээ. Гэтэл А.Ариунболд, Тухайн үеийн Монголбанкны Ерөнхийлөгчөөр ажиллаж байсан Н.Золжаргалыг цохож нэрлэв.

2015 онд Н.Золжаргал түүнд "Банкийг нь дампууруулж байхгүй болгох даалгаврыг намаасаа авсан" тухай хэлсэн гэв. Улмаар 864 тэрбум төгрөгийн үндсэн активтай байсан банкнаас 300 гаруйг нь Монголбанкнаас татсан. Гэрээний хугацаанаас өмнө татсан нь 49 хувийг авах санхүүжилтэд татагдсан байх боломжтой бөгөөд цаг хугацааны хувьд тэгж таарч байгаа. Мөн банканд нь хадгалагдаж байсан НДС-гийн гэх 240 тэрбум төгрөгийн 110 нь л НДС-гийн мөнгө, үлдсэн 128 нь "Капитал банк"-ны цэвэр хүү. Энэ мөнгө 2004-2015 оны хооронд буюу Б.Ундармааг УИХ-ын гишүүн болохоос өмнө байршсан байсан" гэхчлэн ярив.

Анализ: УИХ-ын гишүүн асан Б.Ундармаа хаачсан бэ?

А.Ариунболд "Капитал" банкийг төлөөлөн ярих субьект мөн үү. А.Ариунболд Б.Ундармаагийх нөхрийн байр сууринаас "Капитал" банканд хувь эзэмшиж, ногдол ашиг авдаг төдий, гүйцэтгэх удирдлагын түвшинд нөлөө байхгүй гэгддэг байжээ. Товчхондоо, тэр "Цагаан гартай паразит" байсан гэсэн үг. Ойр тойрныхон ч энэ тухай нь сайн мэддэг гэлцдэг. Эдний гэр бүлд өдгөө "Бишрэлт групп" бий. Тус группийг Б.Ундармаагийн дүү Б.Болормаагийн "Монгол эмимпекс" нуруундаа үүрч явдаг. Тиймээс л дампуураад таван жил болсны хойно тэр тусмаа А.Ариунболд яагаад гэнэт гарч ирж ярив гэдэг нь хэн хүнд сонин байна.

У.Хурц-Үг