УИХ-ын гишүүн, ХЗДХ-ийн сайд асан Б.Энхбаяр уучлал гуйхгүй бол хуулийн байгууллагад хандана
УИХ-ын гишүүн Б.Энхбаяр Хууль зүй, дотоод хэргийн сайдаар ажиллаж байхдаа эрх мэдэл, албан тушаалаа ашиглаж, Хятадын компанид давуу байдал олгосон түүнчлэн ажил үүргээ гүйцэтгэсэн сэтгүүлчийн нэр төрд халдаж байгаа талаар сэтгүүлч Э.Саруултөгс мэдээлэл хийлээ.
Тодруулбал, Б.Энхбаяр гишүүн Хууль зүй, дотоод хэргийн сайдаар ажиллаж байхдаа буюу 2024.01.16-ны өдөр 1/1 дугаартай албан даалгавар гаргаж, Улсын бүртгэлийн ерөнхий газрын дарга Д.Дэлгэрсайхан болон ХХЕГ-ын дарга Х.Лхагвасүрэн нарт хууль бус даалгавар биелүүлэхийг үүрэгдсэн. Энэхүү албан даалгавар нь маш өндөр мөнгөн дүнтэй, 2 компанийн маргааны асуудалд хөндлөнгөөс оролцож, шүүх эрх мэдлээс давж, Хятадын хөрөнгө оруулалттай “Хуашенконстракшн Монгол” компанид илт давуу байдал олгосон. Энэ тухай erenews.mn сайтад мэдээлсний төлөө тус сайтын эрхлэгч Р.Саруултөгсийг гүтгэсэн гэж үзэж байгаа аж.
Тэрээр "Намайг энэ мэдээллийн дараа УИХ-ын гишүүн Б.Энхбаяр өөрийн твитер хуудаснаа нүүрсний хулгайчдаас мөнгө авсан шантаажчин гэж жиргэсэн. Хууль зүйн сайд гэх хариуцлагатай албан тушаал хашиж явсан хүн сэтгүүлчид, бүхэл бүтэн сэтгүүл зүйн салбарын нэр хүндэд халддаг, үүнд нь хууль үйлчилдэггүй байж болохгүй. Надад хэн нэгнээс мөнгө авч, машинаар шагнуулж, шантааж хийсэн зүйл байхгүй. Надад эрэн сурвалжлах сэтгүүл зүйгээр 12 жил бичсэн туршлага байна. Эрэн сурвалжлах сэтгүүл зүй баримт дээр тулгуурладаг гэдгийг та бүхэн мэднэ. Тиймээс Хууль зүй, дотоод хэргийн сайд асан Б.Энхбаярыг уучлалт гуйхыг шаардаж байна, үгүй бол хууль шүүхийн байгууллагад хандаж, эцсээ хүртэл явна" гэсэн юм.
Түүнчлэн өнгөрсөн оны 12 дугаар сард зохион байгуулсан Нүүрсний гэх хэргийн нотлох баримтыг шинжлэн, судлах сонсголыг тухайн үеийн Хууль зүй дотоод хэргийн сайд, одоогийн УИХ-ын гишүүн Б.Энхбаяр даргалсан. Тухайн үед тэрбээр “нүүрсний машинтай 40 сэтгүүлч байна” гэх ор үндэслэлгүй, худал мэдээлэл тарааж байв. Хэрэв 40 сэтгүүлч нүүрсний машинтай бол бүтэн жилийн хугацаанд нэрсийг зарлах, хууль хяналтын байгууллагад шалгуулах боломж байсан. Хууль зүйн сайд гэх хариуцлагатай албан тушаал хашиж явсан хүн сэтгүүлчид, бүхэл бүтэн сэтгүүл зүйн салбарын нэр хүндэд халддаг, үүнд нь хууль үйлчилдэггүй байж таарахгүй гэсэн юм.
