“Khas Zaya”-г үзэл бодлоо илэрхийлснийх нь төлөө яллаж байна
Цахим орчинд олны танил болсон “Khas zaya” гэх аккуантын эзэн сэтгүүлч Г.Санчирыг УИХ-ын сонгуулийн өмнө ЦЕГ-ын Цахим гэмт хэрэгтэй тэмцэх газраас баривчилсан байдаг. Тэрбээр Монголын төрийн бодлого шийдвэр, эрх үйл ажиллагааг хүчтэй шүүмжилж, эсэргүүцлээ олон нийтийн сүлжээнд илэрхийлдэг байсныг цахим орчны хэрэглэгчид сайн санаж байгаа биз ээ.
Монгол Улсын Үндсэн хуульд хүн үзэл бодлоо чөлөөтэй илэрхийлэх эрхтэй гэж заасан байдаг.
Харамсалтай нь, “Khas zaya” гэх аккуантын эзэн Г.Санчирыг үзэл бодлоо илэрхийлснийх нь төлөө буюу фэйсбүүк хуудас болон бусад сошиал хаягуудыг ашиглан бусдын нэр, алдар хүндэд халдаж, илтэд худал мэдээлэл тараасан, заналхийлсэн гэх үндэслэлээр хэрэг үүсгэн яллагдагчаар татжээ.
Түүнийг баривчлсан талаараа хууль шүүхийнхэн ихэд нууцлаж байгаа агаад энэ талаар зарим хэвлэлүүдэд “Хас Заяа гэх хуурамч хаягтай “Дээдсийн амьдрал” сонины эрхлэгч тэргүүтэй бүлэг нөхдийг саатуулав гэх товчхон мэдээллээс өөр албаны тайлбар алга байна. Албан эх сурвалжаас авсан мэдээллээр Г.Санчирыг Монгол Улсын дотоод аюулгүй байдалд сөргөөр нөлөөлж болзошгүй хортой мэдээллийг түгээсэн гэж үзэн Эрүүгийн хуулийн 13.14 дүгээр зүйлийн 1 дэх хэсэгт зааснаар эрүүгийн хэрэг үүсгэн яллагдагчаар татсан аж.
Тайлбар: Зүүн талаас доод эгнээний хоёр дахид сууж буй нь Г.Санчир
Тэгвэл "Хас Заяа" нэрээр мэдээлэл түгээдэг байсан Г.Санчир гэж хэн бэ гэх асуулт олон нийтийн анхаарлыг татаж байгаа биз ээ. Тэрбээр нэрт фото сэтгүүлч Р.Гомбожав агсны хүү бөгөөд “Дээдсийн амьдрал” сониныг эрхэлж байжээ. Түүний аав МОНЦАМЭ агентлагт ажиллаж байсан эрх чөлөөний мэдрэмжтэй, ардчилсан үзэл санаатай сэхээтнүүдийн төлөөлөл аж.
Тайлбар: Зурган дээрх улаан хүрэмтэй нь Г.Санчирын аав Р.Гомбожав
Жич: Эрүүгийн хуулийн “Худал мэдээлэл тараах” гэсэн 13.14 дүгээр зүйлийн 1 дэх хэсэгт “Хүний нэр төр, алдар хүнд, хуулийн этгээдийн ажил хэргийн нэр хүндэд халдсан илт худал мэдээллийг олон нийтэд тараасан бол дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.” гэж хуульчилсан байдаг бөгөөд албан бус эх сурвалжийн өгүүлснээр Г.Санчир ял шийтгүүлэх магадлалтай байгаа аж.
Дашрамд дуулгахад Эрүүгийн хуулийн энэхүү заалт нь ихээхэн маргаан дагуулж ирсэн зүйл заалт. Тодруулбал, "Худал мэдээлэл тараах" гэдэг үндэслэлээр иргэдийн үг хэлэх, үзэл бодлоо илэрхийлэх, хэвлэн нийтлэх эрхийг боомилж яллагдагчаар татаж байгаа нь Үндсэн хуулийн 16.6 дахь заалтыг зөрчиж байна гэж үздэг. Эрх баригчдыг шүүмжилсэн, авлига, албан тушаалын хэргийг илчилж шүгэл үлээсэн иргэдийг, ажлаа хийсэн сэтгүүлчдийг улс төрд нөлөө бүхий этгээдүүдийн гомдлоор шалгаж, гэрчийн мэдүүлэг ч авалгүй шууд яллагдагчаар татаж байгаа нь ардчилсан нийгмийн үнэт зүйл болох иргэдийн үзэл бодлоо илэрхийлэх үндсэн эрхийг зөрчиж байна гэж үзэн маргалдсаар ирсэн билээ.
М.Саян
