ХӨГЖЛИЙН БАНКНЫ ХЭРГИЙН ЭЦСИЙН ШИЙДВЭР БА УЛС ТӨР
Өнгөрсөн 7 хоногт Хөгжлийн банкы гэх тодотгол бүхий гэмт хэргийн Дээд шүүхийн хяналтын шатны шийдвэр гарлаа. Ингэснээр хүлээлтийн байдалд байсан зарим улс төрчдийн хувь заяа тодорхой боллоо.
Сонгуулийн өмнө УИХ-ын гишүүн асан Ё.Баатарбилэгийн хувьд “ялтан” болчихгүй үлдэх гэсэн санаархал нь талаар болж шүүхээс оноосон 6 жилийн ялаа биеэр эдлэх болж байна. Харин УИХ-ын гурван ч гишүүний асуудал хөндөгдөөд байна. Үүнд экс Ерөнхий сайд Н.Алтанхуяг, ХҮН намын Б.Найдалаа нарын хэргийг дахин хэлэлцэх болсон бол УИХ-ын гишүүн Д.Цогтбаатарыг гэмт буруутай гэж шүүх үзлээ.
Д.Цогтбаатар нь УИХ-д Хангайн бүсээс АН-ын төлөөлөл болон сонгогдсон гишүүн юм. Түүнийг Улсын Дээд шүүхээс Хөгжлийн банкны хэлтсийн захирлын албан тушаалыг хашиж байхдаа “Мон Дулаан”, “Газ Импорт”, “Бэрэн” ХХК-д давуу байдал олгосон гэм буруутайд тооцсон юм. Тодруулбал, анхан шатны шүүхээс эрхэм гишүүнд албан тушаалын байдлаа ашиглан бусдад давуу байдал олгосон гэмт хэрэг үйлдсэнд тооцон нийтийн албанд томилох эрхийг хоёр жилээр хасч, 20 сая төгрөгөөр торгох ялаар шийтгэснийг Улсын Дээд шүүх үндэслэлтэй гэж үзсэн юм. Ингэснээр эрхэм гишүүний бүрэн эрхийн асуудал хуулийн дагуу хөндөгдөх болж байгаа юм.
Өөрөөр хэлбэл, УИХ-ын тухай хуулийн 9.1.5-д УИХ-ын гишүүн гэмт хэрэг үйлдсэн болох нь хуулийн хүчин төгөлдөр болсон шүүхийн шийдвэрээр тогтоогдсон бол бүрэн эрх нь энэ хууийн 7.3-т заасан хугацаанаас өмнө дуусгавар болох үндэслэл болно гэж заажээ. Иймээс хуулийн дагуу Д.Цогтбаатар гишүүний бүрэн эрх хөндөгдөх болж байна.
Гэхдээ хамгийн чухал нь нэгэнт тангараг өргөөд халдашгүй эрх нь хэрэгжсэн эрхэм гишүүнийг “явуулах” эсэхийг Д.Амарбаясгалан даргатай ангийн “нөхөд” нь шийднэ. Харин өөрөө УИХ-д дэвшиж чадаагүй түүний төрсөн ах “лайвчин” гэх тодотголт Д.Мөнх-Эрдэнэ дуугүй хараад суухгүй нь бас ойлгомжтой юм. Улс төр улайсах халуун өдрүүд эхэлж байна.
Х.Бумаа
