Д.Оюунбилэг: Хэвтрийн асаргаанд байгаа иргэнийг заавал өөрийн биеэр ирж тоон гарын үсэг өг гэсэн шаардлага тавиагүй!
Хэвтрийн асаргаанд байдаг иргэн бүртгэлийн байгууллагад дамнуургатайгаа очиж хурууны хээгээ бүртгүүлж буй үйл явдлын бичлэг олон нийтийн сүлжээнд тархаж, иргэдийн дунд багагүй шүүмжлэл дагуулаад байна.
Энэ талаар Чингэлтэй дүүргийн Улсын бүртгэлийн хэлтсийн дарга Д.Оюунбилэгээс тодруулахад дараах хариултыг өгсөн юм.
-Олон нийтийн сүлжээнд тавигдсан шиг хэвтрийн өвчтэй байдалтай хүнийг заавал биеэр нь авчир гэдэг шаардлагыг манай байгууллагаас тавиагүй. Тухайн иргэний ар гэрийнхэн манай байгууллагаас тоон гарын үсэг яаж авах талаар бүрэн мэдээлэл авсан. Бид гэрт нь очоод авч болно, та хүсэлтээ гаргавал бид бэлтгэлээ хангаад очоод авъя” гэсэн. Гэтэл өчигдөр /2025.01.06/ гэнэт ороод ирсэн юм билээ. Ингээд нэгэнт ирчихсэн хүнийг яах билээ гээд бид үйлчилгээгээ үзүүлээд явуулсан.
Ер нь иргэд тоон гарын үсгийг дөрвөн төрлөөр авах боломжтой байдаг.
- 1. Улсын бүртгэлд биеэр очиж авах,
- 2. Хүндэтгэх шалтгаантай, биеэр ирэх боломжгүй иргэд хүсэлт гаргавал зөөврийн төхөөрөмжөөр очиж үйлчилгээ үзүүлэх,
- 3. Киоск машинаар хурууны хээ ашиглан авах,
- 4. Тоон гарын үсэг олгодог Gsign аппликейшн ашиглан авах гэсэн дөрвөн төрлөөс сонгох боломжтой байдаг.
Тухайн иргэний хувьд бид эдгээр хувилбаруудыг хэлж ирэх боломжгүй бол гэрт нь очиж авна гэж мэдэгдсэн байсан” гэлээ.
