П.Батчимэг: Ээжтэйгээ дэндүү адилхан гэж дуудуулах би дуртай

“Шунхлай” группийг үүсгэн байгуулагчдын ээж Г.Оюун гуай таалал төгссөн билээ.

Тэрээр “Шунхлай” группийн Г.Батхүү, П.Батсайхан, П.Батчимэг, П.Бат-Эрдэнэ гэх дөрвөн хүүхдийн ээж юм. Г.Оюун гуай аймгийн төвд анхны “Соёлжих танхим” байгуулж эмэгтэйчүүдэд зориулсан сургалт, соён гэгээрлийн ажлыг эхлүүлсэн, Өвөрхангай аймгийн Эмэгтэйчүүдийн зөвлөлийн даргаар 10 гаруй жил ажиллаж охид, эмэгтэйчүүдийн төлөө чин зүтгэлээр ажилладаг байжээ.

Түүний ганц охин болох УИХ-ын гишүүн П.Батчимэг ээжийгээ дурсан цахим хуудастаа ийн бичжээ.

Тэрбээр "Ээж минь усан хонь жилтэй, ард гаралтай, Монгол Трансын анхны жолооч 100, 200 мянгат жолооч Пунцагийн Гаваагийн хоёр дахь охин. Уугуул нутаг Өвөрхангай, унасан газар Дэлгэрэх сум, угаасан ус Дэлгэрэх булаг.

Дээд тэнгэрээс эхтэй, дэлхий ертөнц эргэн байх зуурт хүний биеийг олж, хүй мандалд зочлохдоо Ээж минь та энэ биед баймгүй энэрэл нигүүсэл, эрдэм ухаан, далай мэт цагаан сэтгэл, ухарч шантардаггүй чадвар, халуун дулаан мэдрэмж, зогсолтгүй урагшлах хүч тэнхээ, далд ертөнцийн увидаст гүн шингэсэн мэт их ухааныг олж төрсөн нь бишрэм агуу.🙏

Ээжтэйгээ дэндүү адилхан гэж дуудуулах би дуртай. Энэ биеийг төрүүлж, өсгөж, хүмүүжүүлж, хүн байхын утга учрыг багаас минь суулгаж, хүний дайтай явах ухаан хайрласан ЭЭЖ тандаа сөгдөн мөргөе.🙏" хэмээн бичсэн байна.