Түлхүүрийн нүхээр: Чуулган завсарлаж, төрийн түшээд тойргоо услаад завгүй явна

Төрийн түшээд сонгууль, сар шинийн баяр дөхөөд ирэхтэй зэрэгцээд, чихэр боов, түмпэн шанага, мөнгө төгрөг бариад тойргоо услаад гүйчихдэг нь гэм биш зан. Жилийн жилд тойргоо услаж мөнгө тараалаа “Чи хэдийг тараасан юм” гэж бие биерүүгээ агсамнана. Сүүлдээ цагаандаа гарч “Би хэдэн төгрөг тараасан юм. Ах, дүүдээ мөнгө барьж золгосон, энэ буруу юу” гэж томордог болсон.  Бүр тойргийн иргэддээ сар шинийн мэнд дэвшүүлэх нэрийн дор 20 мянган төгрөг хүртэл тарааж явсан хөндүүртэй түүх ч бий.

Тэгвэл оны өмнө /2025.12.31/ УИХ-ын намрын чуулган өндөрлөж гишүүдийн зарим нь гадаадад томилолттой байгаа бол ихэнхи нь тойргоо услахаар тал нутгаа зорьж байна. Тухайлбал, Нэгдүгээр тойрог буюу Өвөрхангай, Архангай, Баянхонгор аймгаас сонгогдсон Гадаад харилцааны сайд Б.Батцэцэг баруун бүсийг зорьж Баянхонгор аймагт ажиллаж буй. Ард иргэдтэйгээ уулзалт зохион байгуулж жигтэйхэн ойр дотноор зургаа татуулж, өнгө үзэмж хосолсон кино шиг рийлсүүдээр бөмбөгдөж байна. Тэрээр уулзалтынхаа талаар “Их хурлын  тойрогтоо хийж хэрэгжүүлж буй төсөл, цаашид хэрэгжүүлж ажиллах арга хэмжээ, Засгийн газрын бодлого үйл ажиллагаа, Гадаад харилцааны салбарт хэрэгжүүлсэн үр дүнгээ иргэдэд ил тод мэдээлж явна” гэжээ.

Түүний өмнө УИХ-ын гишүүн Ж.Баясгалан орон нутаг дахь хөгжлийн бэрхшээлтэй иргэдийн нөхцөл байдал, нийгмийн асуудлуудыг хэрхэн шийдвэрлэж буйтай танилцаж, тэдний  дуу хоолойг бодлого боловсруулагчдад хүргэх зорилгоор 21 аймгийг хамарсан уулзалтыг зохион байгуулсан талаараа УИХ-ын чуулганы танхимд хэлж байв.

Ингээд зогсохгүй Сонгинохайрхан дүүргээс сонгогдсон УИХ-ын гишүүн Ч.Номин, УИХ-ын гишүүн Д.Батбаяр нараар үргэлжилнэ.  

Харин тэдний ийнхүү тойрогтоо ажиллаж байгаа, хөдөө томилолтоор том том машин хөлөглөж яваа зардал хаанаас гардаг нь анхаарал татна. Магад татвар төлөгчдийн мөнгөнөөс энэ их зардал гардаг бол иргэн бүр хяналт тавих нь зүй ёсны хэрэг. Өнгөрсөн жил "Тойргийн гишүүдэд 15 тэрбум "тараах" байдлаар нөлөөлөхийг дэмжихгүй. ЗГ төсвөө захиран зарцуулах ажлаа хий” гэх асуудал ч хөндөгдөж байсан удаатай. Тэгэхээр УИХ-ын гишүүдийн томилолт, тойрогтоо ажилласан төсөв мөнгөний талаар бид эргэн мэдээлэх болно.

М.Үүрийнтуяа