Гэрлэлтээс гадуурх бэлгийн харьцааг гэмт хэрэгт тооцох болжээ
Индонезид хэрэгжүүлж эхэлсэн шинэ хууль гадаадын жуулчдад ч хамаарна.
Тус улсад 2022 онд баталсан Эрүүгийн хуулийн хэрэгжилтийн хугацаа 2026 оны 1-р сарын 2-ноос хүчин төгөлдөр болжээ. Уг хуульд “Гэрлэлтээс гадуурх харилцан тохирсон, эсвэл сайн дурын бэлгийн харьцааг гэмт хэрэгт тооцож, шоронд хорих ял ногдуулна” гэж заажээ. Тодруулбал албан ёсны гэр бүл биш хүнтэй бэлгийн харьцаанд орвол нэг жил хүртэлх хугацаагаар хорих, эсвэл 10 хүртэл сая рупигээр торгох ял ногдуулах юм байна. Мөн хүчин төгөлдөр гэрлэлтгүйгээр хамтран амьдрах нь зургаан сар хүртэлх хугацаагаар хорих ял, эсвэл торгуультай. Хууль хэрэгжүүлэхэд гадаадын иргэн болон жуулчид ч хамаарна.
Гэхдээ үнэндээ уг хуульд үндсэн анхааруулга байгаа талаар мэргэжилтнүүд онцолжээ. Индонезийн эрх баригчид гэр бүлээс гадуурх бэлгийн харьцаанд өөрийн санаачилгаар эрүүгийн хэрэг үүсгэж болохгүй. Тухайн хүний эсрэг хэрэг үүсгэхийн тулд гэр бүлийн гишүүд, ойрын хүмүүс нь “гэмт этгээдүүдийн” ёс суртахуунгүй зан авирын талаар гомдол гаргах ёстой аж. Гэрлэсэн хосуудын хувьд ийм өргөдлийг зөвхөн эхнэр/нөхөр гаргаж болно. Харин гэрлээгүй хосуудын хувьд бол сайн дураараа "гэмт хэрэг хийсэн" этгээдүүдийн эцэг эх, эсвэл хүүхдүүд ийм боломжтой. Хэрэв шүүх хурлаас өмнө гомдлоо буцаан авбал “ялыг” автоматаар хэрэгсэхгүй болгоно.
Индонезийн эрх баригчид иргэдийн хувийн нууцад нөлөөлөх эрүүгийн хуулийн томоохон багц нэмэлт өөрчлөлт хийхээр 2019 оноос хэлцэж эхэлсэн бөгөөд өдгөө ийнхүү хэрэгжүүлж эхлэв. Ийм нэмэлт өөрчлөлтийн эсрэг онлайн өргөдөлд 900 000 гаруй хүн гарын үсэг зурж, улс орон даяар олон нийтийн жагсаал зохион байгуулах үеэр мөргөлдөөнд хүрч байсан ч хатуу байр суурьтайгаар баталсан нь цаанаа олон агуулгатай. Хэрэв хүчингийн хэргийг сайн дурын үндсэн дээр гэж үзээд, үүний үр дагавраар жирэмсэлсэн бол яах вэ, үр хөндүүлэх зэрэг асуудлыг хэрхэн шийдвэрлэх вэ гэхчлэн асуудлууд энэ хуулиар цэгцэрч байгаа гэж албаныхан тайлбарласан байна.
Ташрамд өгүүлэхэд, Индонезийн Эрүүгийн хуульд гэрлэсэн хүмүүс нэгнээ хуурвал завхайрлын гэмт хэргийн шийтгэл ногдуулдаг юм байна. Шариатын хууль хэсэгчлэн хэрэгждэг Суматрын хойд хэсэгт орших Ачех автономит муж зэрэг Индонезийн хамгийн консерватив бүс нутагт зочид буудлууд гэрлээгүй хосуудыг нэг өрөөнд байрлуулах нь түгээмэл. Харин Бали зэрэг олон улсын аялал жуулчлалын алдартай газруудад үүний эсрэгээр баримт бичгийг заавал баталгаажуулдаг гэдгийг тус улсын сайтуудад онцолжээ.
Ж.Цэцэг
