Доналд Трампыг эрс шүүмжилдэг байсан Ники Минаж Трампын талд урваад эхэлжээ
Сүүлийн жилүүдэд дуучин Ники Минажийн улс төрийн байр суурь олны анхаарлыг ихээхэн татах болсон. Нэгэн цагт Дональд Трампын цагаачлалын бодлогыг хатуу шүүмжилж, өөрийгөө “Трампын тэрэгт суухгүй” хэмээн илэрхийлж явсан тэрбээр өнөөдөр MAGA хөдөлгөөний хамгийн чанга дуу хоолойтой дэмжигчдийн нэг болж хувирсан нь олон хүнийг гайхшруулж байна.
2020 он хүртэл Ники Минаж Трампын бодлогыг, ялангуяа цагаачлалтай холбоотой шийдвэрүүдийг ил тод шүүмжилдэг байв. Тэрээр бага насандаа Тринидад ба Тобаго улсаас АНУ-д бичиг баримтгүй цагаач хүүхэд болж ирсэн гэдгээ нуудаггүй. 2018 онд Трампын засаг захиргааны үед хил дээр цагаач гэр бүлүүдийг салгаж буй бодлогын эсрэг сэтгэл хөдөлгөм пост бичиж, “5 настайдаа эцэг эхээсээ сална гэдэг ямар аймшигтайг би төсөөлж чадна” хэмээн мэдэгдэж байлаа. Мөн Pollstar Live 2020 чуулганы үеэр “Трампын талд орохгүй” гэж тодорхой хэлж байсан нь түүнийг шүүмжлэгчдийн эгнээнд баттай оруулж байв.
Гэвч түүний энэ байр суурь COVID-19 цар тахлын үеэс эхлэн аажмаар өөрчлөгдөж эхэлсэн гэж ажиглагчид үздэг. 2021 онд түүний вакцинтай холбоотой маргаантай мэдэгдлүүд олон нийтийн анхаарлыг татаж, улмаар засгийн газрын эсрэг байр суурьтай бүлгүүдийн дэмжлэгийг авах болсон.
Сүүлийн үед Ники Минаж Дональд Трамп болон дэд ерөнхийлөгч Жэй Ди Вэнс нарыг ил тод магтаж, AmericaFest зэрэг консерватив арга хэмжээнд оролцон, тэднийг “хүмүүстэй ойр, өөртөө татах чадвартай” хэмээн тодорхойлсон. Тэрбээр Трампын бодлогыг сурталчилсан Цагаан ордны бичлэгүүдийг сошиал сүлжээнд дахин түгээж, MAGA хөдөлгөөний бэлгэ тэмдэг болсон контентуудтай нээлттэй холбогдож байна. Үүний хариуд тэрээр олон мянган шинэ дагагчтай болж, баруун жигүүрийн улс төрчдөөс ч магтаал сонсох болжээ.
Гэсэн ч түүнийг үнэхээр “үнэнч дэмжигч” болсон эсэх дээр санал зөрөлдөөн их байгаа юм. Зарим ажиглагчид Ники Минажийн энэ эргэлтийг үзэл бодлын гүн өөрчлөлт бус, харин нийгмийн маргаантай сэдвүүд дээрх эсэргүүцэл, хувийн ашиг сонирхол, эсвэл өөрийгөө хамгаалах стратеги байж магадгүй гэж үздэг. Үүний улмаас түүний олон жилийн үнэнч фенүүдийн нэг хэсэг түүнээс нүүр буруулж, сошиал орчинд “салах” видеонууд хүртэл түгэх болсон.
Ники Минаж өнөөдрийн байдлаар Дональд Трампыг ил тод дэмжиж, үзэл бодол нийцэж байгаагаа илэрхийлсэн мэдэгдлүүд хийж байгаа нь маргаангүй үнэн. Харин энэ нь түүний улс төрийн итгэл үнэмшлийн эцсийн, тогтвортой байр суурь мөн үү, эсвэл цаг үе, нөхцөл байдлаас шалтгаалсан ээлжит эргэлт үү гэдгийг цаг хугацаа л харуулах бололтой.
