73000 настай “хүн” олдов, хүн төрөлхтний түүхийг дахин бичих үү
Олон улсын эрдэмтэд хүн төрөлхтний гарал үүслийг тайлахаар өнө удаан хугацаанд хичээж ирсэн. Орчин үеийн хүмүүс буюу бидний өвөг дээдэс хэн бэ, неандертальчууд уу, денисовачууд уу гэхчлэн маргалдах нь бий.
Юутай ч өмнөх тооцоогоор бидний өвөг дээдэс 750 000 жилийн өмнө үүссэн гэж үздэг. Гэтэл үүнээс барагцаагаар 23 000 жилийн өмнө амьдарч байсан хүмүүсийн чулуужсан үлдэгдэл Мароккогийн Касабланка орчмын агуйгаас олдсон нь хүн төрөлхтөний түүхийг шинээр бичихэд хүргэх магадлал өндөртэй гэдгийг “Nature” сэтгүүлд мэдээлэв.
Тэрхүү олдворын эзэн нь орчин үеийн хүн ба неандертальчуудын сүүлчийн нийтлэг өвөг дээдэс байж магадгүй аж. “Үлдэгдлүүд нь тэднийг неандертальчуудаас ялгаж салгадаг эртний болон орчин үеийн онцлог шинж чанаруудын өвөрмөц хослолыг агуулсан бөгөөд хомо сапиенс үүсэхэд хүргэсэн Африкийн удам угсааг төлөөлж магадгүй” гэж нээлтийг хийсэн олон улсын багийхан мэдээлэв.
Мароккогийн агуйгаас яг юу олдсон бэ. 1994-2015 онд судлаачид Касабланка дахь хуучин карьерын агуйг малтан, судлах явцдаа 300 гаруй чулуун багаж, хэрэгсэл, устаж үгүй болсон амьтдын олдвор болон эртний 21 хүний үлдэгдэл илрүүлсэн юм байна. Тэдгээрийн дотор насанд хүрсэн болон бага насны хүүхдийн эрүү, дөрвөн шүд, найман нугалам, махчин амьтан магадгүй цөөвөр чононд хазуулсан ул мөртэй гуяны яс байжээ.
Үүнээс гадна 10 гаруй жилийн өмнө нөгөөх карьераас нэгэн сонирхогч цуглуулагчийн олсон өөр нэг насанд хүрсэн хүний эрүүний ясыг хамтатган судалж, бидний өвөг дээдсийн талаарх түүхийг шинэчлэх магадлатай гэсэн дүгнэлтэд хүрчээ
