Испанид өндөр хурдны галт тэрэг мөргөлдөж, 39 хүн амиа алджээ
Испанийн өмнөд хэсэгт, Кордова хотын ойролцоох Адамуз сууринд өндөр хурдны хоёр галт тэрэг мөргөлдөж, наад зах нь 39 хүн амь үрэгдэж, 100 гаруй хүн бэртсэн байна. Мадрид чиглэлд явж байсан энэ галт тэрэг замаасаа гарч, эсрэг чиглэлийн галт тэрэгтэй мөргөлдсөн аж. Төмөр замын сүлжээний мэдээлснээр хоёр галт тэргэнд нийт 400 зорчигч болон ажилтан зорчиж явжээ. Онцгой байдлын алба 122 хүнд эмнэлгийн тусламж үзүүлснээс 43 хүн эмнэлэгт хэвтэн эмчлүүлж байна. Тэдний дотор дөрвөн хүүхэд байгаа бөгөөд үүнээс 12 том хүн, нэг хүүхэд эрчимт эмчилгээний тасагт хэвтэж байгаа аж. Хэвтэн эмчлүүлж буй зарим хүний биеийн байдал тун хүнд байгаа бөгөөд ослын шалтгааныг тогтоох мөрдөн шалгалт эхэлжээ.
Ослын улмаас Мадрид, Андалусийн чиглэлийн бүх галт тэрэгний хөдөлгөөнийг түр хугацаанд зогсоосон байна.
Францын Ерөнхийлөгч Эммануэль Макрон, Италийн Ерөнхий сайд Жоржа Мелони, Европын Комиссын дарга Урсула фон дер Ляйен нар эмгэнэл илэрхийлсэн мэдэгдэл гаргажээ. Макрон сошиал сүлжээнд: “Миний бодол санаа хохирогчид, тэдний ар гэр болон Испанийн ард түмэнтэй хамт байна. Франц улс та бүхэнтэй хамт байна” хэмээн бичсэн байна. 2013 онд Испанийн Галиси мужид болсон өндөр хурдны галт тэрэгний ослоор 80 хүн амь үрэгдэж, 140 хүн бэртсэн нь тус улсын хамгийн том төмөр замын осол болж байв. Испани нь Хятадын дараа дэлхийд хоёрдугаарт ордог өндөр хурдны төмөр замын сүлжээтэй бөгөөд улс даяар 50 гаруй хотыг холбодог юм.Испанийн төмөр замын нийт урт 4,000 км-ээс (2,485 миль) давжээ.
