Ноцтой: МҮЭХ-ны мэргэжилтнүүд холбооныхоо Ерөнхийлөгчийн гарын үсгийг хуурамчаар үйлдэж ОУ-ын байгууллагаас их хэмжээний мөнгө завшжээ

Өмнөх удирдлагуудын үед МҮЭХ-ны нэр бүхий гурван мэргэжилтэн холбооныхоо Ерөнхийлөгчийн гарын үсгийг хуурамчаар үйлдэж Олон Улсын байгууллагаас их хэмжээний мөнгө хувьдаа завшсан ноцтой хэрэг гарчээ. Тухайн үед тэдгээр алба хаагчдыг ажлаас нь чөлөөлөөд өнгөрсөн аж.

Эх сурвалжийн мэдээллээр, “тэдгээр мэргэжилтнүүд Монголын Үйлдвэрчний эвлэлд арав гаруй жил ажилласан бөгөөд ажиллаж байх хугацаандаа алдаа дутагдал цөөнгүй гаргаж байсан төдийгүй аливаа тендер, төслүүдээс үргэлж хувьдаа мөнгө завшиж, халааслаж байдаг” гэнэ.

Тухайлбал, БНХАУ-ын үйлдвэрчний эвлэлийн байгууллагаас МҮЭХ-ны мэргэжилтнүүдийг гадаадад сургах, мэргэшүүлэх хүсэлтийг хүртэл хувьдаа ашиглаж өөрсдийн хүүхдүүдээ явуулсан байна.

Ингээд “хумсалсаар, хумсалсаар хулгайч” гэдэг шиг хулгай нь бүр дэвшиж Ерөнхийлөгчийнхөө гарын үсгийг хуурамчаар үйлдэж Олон Улсын байгууллагагаас мөнгө завшсан аж.  Гэвч тэдэнд ноогдуулсан арга хэмжээ  нь ердөө хэсэг хугацаанд ажлаас нь чөлөөлсөн. Хэсэг хугацаанд гэдгийн учир нь, одоо тэдгээр мэргэжилтнүүд бүгд эргээд ажилдаа оржээ. Гэсэн ч нөгөө л сурсан зангаа тавихгүй хулгай хийж хумсалсаар байгаа аж. Хамгийн хачирхалтай нь, нэг мэргэжилтэн нь бүр удирдах албан тушаалд томилогдсон гэнэ.

Монголын Үйлдвэрчний эвлэлийн холбоо нь үйлдвэрчний эвлэлийн хөдөлгөөнийг эрчимтэй хөгжүүлэх замаар гишүүд, иргэдийн хөдөлмөрлөх эрх, түүнтэй холбогдсон хууль ёсны ашиг сонирхлыг тууштай хамгаалах учиртай билээ. Товчхондоо, хөдөлмөрчдийн эрх ашгийн төлөө тууштай зогсох байгууллага юм.

Гэтэл энэ байгууллагын хэсэг мэргэжилтнүүдийн ухамсар дорой, хувийн ашиг сонирхол давамгайлсан байдлаас үүдэж байгууллагын хэвийн үйл ажиллагаа алдагдах, цаашлаад хичнээн төгрөгийн алдагдал, хохирол амсахыг таашгүй юм. Хулгайн мөнгөнд амташсан тэдгээр хүмүүс шунал энэ хүрээд өндөрлөнө гэж үгүй биз ээ. Хулгайн сэдэл нь илүү нарийн болно.

Өнгөрсөн онд /2025.06 сар/ Авлигатай тэмцэх газраас Монголын үйлдвэрчний эвлэлийн холбоо (МҮЭХ)-ны удирдлагуудтай холбоотой хэргийг шалгаж эхэлсэн байдаг. Дэлгэрүүлбэл, МҮЭХ-ны удирдлагууд холбооны нэр дээрээ бүртгэлтэй газрыг бусдад хууль бусаар шилжүүлж, үүнийхээ хариуд хувийн хэвшлийн ААН-үүдээс үл хөдлөх хөрөнгө авсан, мөнгө угаасан байж болзошгүй нөхцөл байдал тогтоогдсон. Улмаар тус байгууллагын обьектод АТГ-аас нэгжлэг хийж байсан удаатай. 

 Ийнхүү өнгөрсөн удирдлагуудын бугшсан асуудал дээр мэргэжилтнүүдийн хувьдаа мөнгө завшсан асуудал нэмэгдэж байна.