Б.Амарсайхан, Ц.Санжаачойпэл, Э.Тэмүүлэн, Н.Алтан-Очир нарт холбогдох хэргийн гэм буруугийн шүүх хурал эхэллээ
УИХ-ын гишүүн асан Ц.Цэрэнпунцагийн хүү Ц.Санжаачойпэл, "Говь" компанийн Гүйцэтгэх захирал Б.Амарсайхан, "Эрэл" группын захирал Б.Эрдэнэбатын хүү Э.Тэмүүлэн нарт холбогдох эрүүгийн хэргийн гэм буруугийн шүүх хурал өнөөдөр Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүх хурал болж байна.
Сүхбаатар дүүргийн Прокурорын газраас Эрүүгийн хуулийн тусгай ангийн 11.4 дүгээр зүйлийн 1 дэх хэсэг, мөн хуулийн тусгай ангийн 11.6 дугаар зүйлийн 1 дэх хэсэг, мөн хуулийн тусгай ангийн 20.16 дугаар зүйлийн 1 дэх хэсэгт заасан гэмт хэрэгт Ц.Санжаачойпил, Э.Тэмүүлэн, Б.Амарсайхан, Л.Алтан-Очир, Д.Саяннямбуу нарыг яллагдагчаар татсан. Тодруулбал, хохирогчоор тогтоогдоод байсан Д.Саяннямбуу ч мөн уг хэрэгт яллагдагчаар татаж, хэргийг шүүхэд шилжүүлээд буй юм.
Шүүх хурлаас:
Шүүгдэгч Б.Амарсайхан: -Тухайн өдөр бааранд найзуудтайгаа уулзсан. Тэгээд баарнаас гарч ирээд зогсож байтал цаана хүмүүс жаахан маргалдаж байсан. Таньдаг хүмүүс юм чинь удаан маргалдахгүй байлгүй дээ гэж бодсон. Тухайн үед Д.Саяннямбуутай ямар ч маргаан үүсгээгүй. Машины тэнд Д.Саяннямбууг цохисон зүйл байхгүй. Би найзуудаа хоёр талаас нь салгах гэж их хичээсэн. Д.Саяннямбууд гарсан хохиролд маш их гэмшиж байна.
Шүүгдэгч Д.Саяннямбуу: -Тэр өдөр намайг гадна гарч ирээд, найзуудтайгаа уулзаад хоол идэх үү гэж асуугаад байж байтал гэнэт цохисон. Яагаад тэгэснийг ойлгоогүй. Тухайн үед өвдөлттэй байсан болохоор их зүйлийг мартаж, санасан. Би цохиулчихаад юунд ч оролцож чадаагүй.
Шүүгдэгч Ц.Санжаачойпэл: -Бид хэд арван хэдүүлээ байсан. Бааранд сэт авсан. Тэгэхээр 14, 15-уулаа хоёр шил архи уусан. 0,75 л билүү, 1 литр байсан байх. Манай найз охиныг бааран дотор зогсоо зайгүй хоргоогоод зогсож байсан. Манай найз охин "би найз залуутай" гэхэд зогсохгүй байсан гэсэн. Тэгээд гадагшаа гартал дахиж өдөөд, хоргоогоод зогсож байсан. Намайг таньдаг л даа. Хажууд нь зогсоод юм яриад, ер нь удаа дараа өөр лүү нь бичдэг байсан гэж хэлсэн. Тэгээд хажуунаас нь салахгүй байсан. Тэгэхээр нь яах гээд байгаа юм бэ гэсэн чинь "яасан ч яадаг юм" гэж хэлсэн. Тэгээд хажуунаас цохих гэж байгаа юм шиг гараа далайсан юм шиг санагдсан. Тэгээд би инстектээрээ цохисон. Тэр бол миний буруу.
Шүүгдэгч Д.Саяннямбуу: -Би н.Хүслэнг танихгүй, ямар ч харилцаа байхгүй. Би огт маргалдаагүй. Манай найзууд маргалдаад зогсож байсныг мэдэхгүй юм байна. Би юу ч мэдэхгүй найзуудаа хоол идэх үү гэж асуутал намайг гэнэт цохисон. Тараад гарч иртэл шууд урд зогсож байсан. н.Өлзийсайхан, н.Тулга хоёрыг таньдаг. Ямар ч байсан эхлээд цохиулаад, пад харанхуй газар уначихсан чимээтэй хэрнээ ямар ч ухаангүй байсан.
Гэрчийн мэдүүлэг
Хүслэн (Esther): -Өөдөөс харж сууж байсан залуучуудаас нэг нь өмнө нь инстаграмаар надтай холбогдож байсан залуу байсан бөгөөд надтай мэндэлсэн. Тэр залууг Өлзий гэдэг. Өлзийтэй хамт сууж байсан бусад залуус надтай яриа өдөөхийг оролдсон. Тухайн үед би тоолгүй холдож, бүжиглэсэн.
Удалгүй гадаа гарч, найз Эрхэмбилэгийн хамт такси барихаар зогсож байхад дотор байсан цайвар өнгийн хувцастай нэг эрэгтэй, бараан өнгийн хувцастай өөр нэг эрэгтэй над дээр ирж яриа өдөн, дахиад ойртож байсан. Дотор бүжиглэж байх үеэс эхлэн тэд намайг байнга дагаж, хоргоож байсан.
Тухайн үед миний найз залуу Ц.Санжаачойпэл ирж, “Манай найз охиныг битгий хоргоогоод бай” гэж хэлсэн. Би хурдан такси дуудаж явах зорилгоор зам дээр зогсож такси барьсан. Эргэж харахад миний найз залуу Ц.Санжаачойпэл өөрөөсөө өндөр нэг залуутай заамдалцаад зогсож байсан.
Санжаачойпэл, Эрхэмбилэгтэй хамт таксинд сууж байхад тухайн этгээдүүд таксины шилийг хагалах гэж байгаа мэт хүчтэй цохисон. Үүний дараа таксины жолооч бууж, “Наад асуудлаа зохицуулаач ээ” гэж хэлсэн. Тэр үед таксины арын хаалгыг гаднаас нь онгойлгон, намайг өшиглөж, толгой руу цохисон. Тэгээд миний найз залуу таксинаас буусан.
