Б.Хурцын хүү Х.Тайваны ээлжит зодооны бай нь УИХ-ын гишүүн П.Сайнзориг болов

УИХ-ын гишүүн П.Сайнзориг ТЕГ-ын дарга асан Б.Хурцын хүү Х.Тайвантай зодолдсон гэх мэдээлэл цахим орчинд цацагдаад байна. Тодруулбал өнгөрсөн шөнө /2026.02.05/ УИХ-ын гишүүн П.Сайнзориг, Б.Хурцын хүү Х.Тайван нарын хүмүүс согтууруулах ундааны зүйл хэрэглэж, хоорондоо муудалцсан талаарх мэдээлэл тархаад байна. Уг хэргийг холбогдох албаныхнаас тодруулахад "Энэ хэрэг өнгөрсөн шөнө Сүхбаатар дүүрэгт бүртгэгдсэн. Одоогоор мөрдөн шалгах ажиллагаа явуулж байна" гэх тайлбар мэдээлэл өгсөн. 

Тэгвэл УИХ-ын гишүүн П.Сайнзориг цахим хуудастаа дараах тайлбар хийжээ.

Тэрбээр "Худал мэдээлэл зохион байгуулалттай их цацаж байна. Залуучууд дарвиад л асуудал үүсгэлээ дээ. За яахав дээ гэж бодож байтал зохион байгуулалттай гүтгэлэг яваад байх юм. Танихгүй залуучууд хоргоогоод дараа нь гэнэт цохиод авсан. Дараа нь Хурцын Тайван, Бямбаа нар байсан гэдгийг мэдлээ. Камерын бичлэг дээр тэгээд тодорхой байгаа дөө. Нэлээн хай болчихсон юм шиг нөхдүүд шиг санагдсан, элдэв зүйл хэрэглэсэн байгаагүй л бол яахав. Хуулийн байгууллага шалгах байх. Бухимдал төрүүлсэндээ хүлцэл эрье ээ та бүгдээсээ" гэжээ. 

Х.Тайваны хувьд Б.Хурцын ганц хүү. Аавынхаа залгамж халааг авна гэгддэг байсан тэрээр УИХ-ын гишүүн асан Л.Элдэв-Очирын охин Э.Золзаяатай олон жил үерхсэний эцэст 2019 онд хуримлан, гал голомтоо бадрааж байв. 

Өдгөө хоёр хүүхэдтэй болсон Х.Тайван 2019 оны 12 сарын 27-ны өдөр УИХ-ын гишүүн Н.Номтойбаяр луу архины шил, хундага шидэн, толгой нүүрийг нь гэмтээж байсан удаатай. Шаггүй цөстэй, хөөрүү залуу гэдгээрээ олонд танигдсан түүний ээлжит дуулиан мөн л УИХ-ын гишүүнийг зодсон тухай байлаа. Цахим хаягтаа тун идэвхтэй байж, нээлттэй үзэл бодлоо илэрхийлдэг болсон түүний эл хэрэг хэрхэн шийдэгдэхийг харах л үлдлээ.