Гал морин жилээ угтсан дээдчүүдийн Show Time!

УИХ-ын дарга Н.Учралыг аав ээжтэйгээ золгохоос нь өмнө манай урлаг соёлынхон элит хүрээнд горилогсод түрүүлж золгон Үндэсний телевизийн анкор Н.Ундрал нь бараг л шууд дамжуулалт хийв. Бага байхад хамаатны ах эгч нар “Авьяасаа үзүүлбэл бэлгийг чинь өгнө” гэдэг шиг хэдэн дуучид маань энд тэнд золгох гэж очоод санаатай санамсаргүй ихэвчлэн хөгжимгүй дуулж мэнчийж зогсов.

Шадар сайд Х.Ганхуягийн орд харш шиг гэр хамгийн гоё өргөөгөөр шалгарав.

Хамгийн олон рийл шуурхай хийж дамжуулсан хүн дэд сайд Г.Дашням байв. Залуугаас Даашка, Н.Учрал хоёр маань аль аль нь өндөр сэнтийд дөнгөж суусных уу элдэв санаа суугаагүй, хүүхдээрээ, өөрийнхөөрөө баярлацгаав. Хамгийн гоё дээл Ерөнхийлөгч У.Хүрэлсүхийнх байв. Манай хүн пиарын зөвлөхтэй, зөвлөхгүй нэг тийм тос даасан жинхэнэ монгол гоё “убба” гэдэгтэй маргах хүн одоо байхгүй болсон.

Хамгийн урт хадаг, нүнжигтэй таваг, ширээтэй нь Аса аваргын байв. Сүүлд суусан залуу гэргий нь ч хөөрхөн, донжтойг хэлэх үү, нүүр, нүд дүүрэн сайхан байлаа.

Г.Занданшатар дарга маань С.Жавхлан Т.Баясгалангийн араас “Tonight” шоунд юу ч юм хайж орлоо. Бүхэл бүтэн улсын Ерөнхий сайд хэдэн лайк, үзэлтийн араас лав яваагүй байх. Магадгүй 20+ жилийн дараа анхны хайртайгаа эргэж суух гээд ч юм уу тв-ээр мэндчилсэн байх вий дээ, мөн үү?

Алтан партнеруудын араас Б.Болд Х.Мөнгөнцэцэг нар хун цэн галуу шиг хосолж яваагаа гайхууласхийн нийтийн дууны хосуудаа өнгөллөө. Тв шоуг мөн л Central TV-гийн Анхаа оргил үзэлт, гоё контентоор базаж чадлаа. Сошиал “чарлаанчид” нүцгэлээд салаад хувь хувьсгалаа бүгдийг нь дэлгэж байж үзэлт их авах болсны хажууд Анхаагийн хийж буй бүхэн яг мэргэжлийн ажил юм. Гал морин жилээ галтай угтлаа. Гадаад хүргэчүүд ч ёс төртэй золгуут хийж харагдсан. Миний Монголын ард түмэн Гал морин жилээ сайхан угтлаа.