Түлхүүрийн нүхээр: Улаанбаатарын 9 дэх Иргэдийн хурлын дарга А.Баяр англиар “хуцна” чиг, түгжрэлийг шийднэ чиг

Түгжрэлээ шийд гэхээр Түгжрэлийн сайд хүртэл томилж уур барж байснаа бодоход манай Улаанбаатар хотын аж ахуйн ажил эмх цэгцтэй яваа. Саарал цамцат хотын дарга Х.Нямбаатар хаа очиж тун аятайхан НИТХ-ын даргатай болсон нь А.Баяр.

А.Баяр 3 мэргэжилтэй. Анагаах ухааны их сургуулийг хүний их эмч, МУИС-ийг эрх зүйч, АНУ-ын Хартфордын их сургуулийг тус тус дүүргэсэн, англи хэлэнд ус цас, олон талын мэдлэгтэй байдал нь өмнөх 8 НИТХ-ын даргаа намтраараа давсан гэсэн үг. Хот гэдэг их айл бол нийтийн аж ахуйн салбар. Хог шороо, тоос тортог, түгжрэл гэхчлэн борог түүрхэн бүхэнтэй хутгалдан ажиллана аа гэсэн үг.

А.Баяр саяны Сар шинийн баяраар маш ухаалаг менежмент хийсэн нь “Хашаагаа нээе” аян. Бүх байгууллагын зогсоолыг нээж, өөрөө ч ажлын албатайгаа Шинийн 1-нд нийслэл хотынхоо хаа сайгүй түгжрэл үүсэж болох газар бүхэнд хүрч ажилласан зэрэг нь бүх талаараа үлгэр жишээ, мөс зүссэн явдал байлаа. Зогсоол л олдож байвал бид түгжрэхгүй, гацахгүй олон асуудал толгой өвдөхгүй шийдэгдэж буйг бид харлаа.

JCI -ын чуулганд дэлхийн 59 орны 5000 гаруй шилдэг удирдагчдын өмнө англиар илтгэл тавьж байсан сийрэг толгойтой энэ хархүүгийн аав “ДЦС-4” ТӨХК-ийн тэргүүн дэд захирал бөгөөд ерөнхий инженерээр саяхныг хүртэл ажилласан, хөлбөмбөгийн “Эрчим” клубын эзэн М.Амарбаясгалан, ээж нь эмч мэргэжилтэй. Товчхондоо ард түмэнд ойр ажил эрхэлдэг нийтийн үйлчилгээний салбарын гэр бүлээс залуу дарга төрөн гарчээ.

А.Баярын он цагаас эхлэн НИТХ-ын дарга гэдэг хүн Хотын даргын “панчаан” төдийхөн нэр төдий нэгэн байхаа болих нь. Х.Нямбаатарт ч гэсэн нэг дарга нэртэй “чиргүүл” биш ачаа үүрэлцэх хамтрагч чухал байлгүй яахав.