"Интермед" эмнэлэг Японы IUHW групптэй стратегийн түншлэлийг эхлүүллээ

Интермед эмнэлэг Япон улсын эрүүл мэнд, боловсролын салбарын хувийн хэвшлийн тэргүүлэгч групп болох International University of Health and Welfare (IUHW)-тэй стратегийн түншлэл байгуулж, “Интермед IUHW” эмнэлэг болсноо зарлалаа. Ингэснээр Японы эрүүл мэндийн стандарт, дэвшилтэт технологи, оношилгоо эмчилгээний шилдэг туршлагыг Монгол Улсад нэвтрүүлэх шинэ шат эхэлж байна.

Түншлэлийн хүрээнд өмнө нь гадаад улсад хийдэг байсан зарим нарийн оношилгоо, эмчилгээг дотооддоо хийх боломж бүрдэж, урьдчилан сэргийлэх үзлэгийг Япон стандартын дагуу хэрэгжүүлэхээр болжээ. Мөн эмнэлэгт хийгдсэн үзлэг, шинжилгээний үр дүнг Японы эмч нар давхар хянаж, баталгаажуулах тогтолцоо нэвтэрч байна.

Японы IUHW "Интермэд" эмнэлэгт 2,2 тэрбум иен буюу 15 сая долларын хөрөнгө орууллаа

М-Си-Эс Групп-ийн Захирлуудын зөвлөлийн дарга Ж.Оджаргал энэхүү хамтын ажиллагаа нь Монголын эрүүл мэндийн салбарыг дэлхийн жишигт хүргэхэд чухал алхам болж буйг онцолсон юм.

Нийт 320 зүсэлт бүхий СТ томограф гэх мэт орчин технолог, япон стандарт Монголд нэвтэрч байна

Хамтын ажиллагааны хүрээнд 320 зүслэг бүхий компьютерт томограф (CT), зүрх, тархи, судасны интервеншнал эмчилгээнд ашиглах ангиографийн дэвшилтэт системийг суурилуулж, телемедицин, телерадиологи, телепатологийн үйлчилгээг нэвтрүүлэхээр ажиллаж байна. Ингэснээр шаардлагатай тохиолдолд Япон эмч нараас шууд зөвлөгөө авах боломж бүрдэх юм. IUHW группийн Удирдах зөвлөлийн дарга Такаги Кунинори Интермед нь Японоос гадна IUHW нэрийг авч буй анхны байгууллага болсныг онцолж, Монголын эмч, мэргэжилтнүүдийг Японд туршлага судлуулах, ур чадварыг нь дээшлүүлэх боломж нээгдэж байгааг тэмдэглэлээ.

Ийнхүү Монголын анхны JCI олон улсын магадлан итгэмжлэлтэй Интермед IUHW эмнэлэг стратегийн хөрөнгө оруулалтаа нэмэгдүүлж, Японы эрүүл мэндийн тогтолцооны туршлагыг нутагшуулснаар салбарын хөгжилд бодит ахиц авчрах нөхцөл бүрдэж байна.