WHO is WHO: Дуучин Ука гэж хэн бэ
Содон дүр төрх, үргэлжийн гал цогтой байдлаараа сонсогчдод эрч хүч нэмдэг, урам зориг өгдөг дуучин бол “Киви” хамтлагийн ахлагч Ука буюу Д.Уламбаяр. Тэрбээр энэ сарын 31-нд “Мөрөөдөл бид хоёр” тоглолтоо “UG arena”-д тоглох гэж буй.
Түүний тухай сонирхолтой баримтуудыг хүргэе.
- Ука 1979 оны арваннэгдүгээр сарын 6-ны өдөр төржээ.
- Бага байхын л урлагийн хүн болохыг хүсдэг байж. Цэцэрлэгт байхдаа шалны модыг хөгжим болгон барьчихаад дуулж, бүжиглэдэг байсан гэдэг.
- Тэрбээр нийслэлийн 44 дүгээр сургуульд суралцаж байгаад өсвөр насандаа өөрийн гэсэн үсчин, гоо сайхны салонтой болохыг мөрөөддөг байсан учраас Үйлдвэрлэл урлалын коллежид оржээ. Тэнд тэрбээр үсчин, гоо сайханч мэргэжил эзэмшсэн.
- Ээж аавынхаа зөвлөснөөр “Орхон” гадаад хэлний дээд сургуульд элссэн ч Ука орчуулагч болохыг хүсээгүй. Ингээд өөрийн хүсэл мөрөөдлийг даган СУИС-ийн жүжигчний ангид шалгуулсан ч уначихжээ. Гэхдээ энэ шалгалтад унасан нь түүнд өөр нэгэн үүд хаалгыг нээж өгсөн юм.
- Оюутан байхдаа зөөгч, цэвэрлэгч, бүжигчин, DJ гээд л төрөл бүрийн ажил хийж мөнгө олдог байснаа тэрбээр дурсдаг.
- СУИС-д шалгуулсны дараа тэрбээр Б.Ангирмаа багшийнхаа “Nature sounds” дамжаанд бүжгийн багшаар ажиллаж эхэлжээ. Энэ нь “Киви” хамтлагт орох анхны алхам байлаа. “Киви” хамтлаг 2004 оны арванхоёрдугаар сарын 1-нд байгуулагдсан.
- Б.Ангирмаа багшийнхаа зөвлөснөөр СУИС-ийн дуулаачийн ангийг төгссөн. Мөн чадварлаг бүжигчин юм. “Нэг хороолол” гэж бүжгийн хамтлагийн гишүүн ч байсан гэдэг.
- “I am in love” бие даасан анхны цомгоо 2011 оны аравдугаар сарын 27-нд гаргасан. Харин анхны тоглолтоо “Do it” нэртэйгээр хийж байв.
- Түүний 2016 онд гаргасан “Маргаашийн нар луу хамт аялах уу” дууны клип Youtube-д 20сая гаруй хандалттай бөгөөд энэ суваг дахь Монголын хамгийн их үзэлттэй 10 бичлэгийн нэг.
- “Don’t stop” дуу нь Азийн шилдэг 50 хип хоп дууны жагсаалтад багтдаг.
- 2018 оноос “The voice” шоуны шүүгчээр ажилласан бөгөөд хамгийн эхний ялагчаар түүний дасгалжуулсан Ц.Энгүүн тодорч байв.
- 2019 онд “Black zebra” студийн “Hi honey”, 2023 онд “Nomadia pictures”-ийн “Гэсэн ч хайртай” киноны гол дүрүүдэд тоглосон.
- Чөлөөт цагаараа зураг зурах дуртай. Хөгжим тавьж байгаад, бийр багс гэхээс илүү будгийн хусуур ашиглаж голдуу акрилаар зурдаг байна. Гэхдээ энэ тухайгаа “Би зурах авьяастай биш л дээ. Абстракт хэлбэр дүрс гаргадаг л төдий” гэсэн.
