Я.Учралын “халтар” PR хэмээх бантан урлагийг муухай харагдуулж байна

Яг үнэндээ “Дараа жил амьд байгаа ч уу үгүй ч үү, энэ жил тоглолтыг нь үзэцгээе” гэж Т.Ариунааг франкадсан нь хамгийн муухай бүдүүлэг байлаа. Хандалт л авч байвал яахаас ч буцахгүй улайрсан сошиал үзүүлбэрийг санаачлагч нь Ц.Хүсэлбаатар найруулагчийн том хүү Я.Учрал. Тэр нэг хар футболк, хар өмдтэйгөө “Камертон”, “Зүрх асна” араас нь “T-ARA” тоглолтыг “машиндлаа”. Дөрвөн улирлыг нэг хувцастайгаа туулж болно л доо арвич хямгач минимал амьдрал юм байгаа биз. Өөрөө л хандалт авч байвал өөрөө л мундаг харагдаж байвал болоо гэсэн шиг тоглолт бүрд хөлсөө дуслуулан, хэрдээ гоёж гангалж очиж оролцсон хэдийгээ, цаашлаад тоглолтын эзнээ муухай харагдуулах нь хачирхалтай. Ер нь том тоглолтуудыг мэргэжлийн найруулагчид урлагт ядаж ганц клип хийж үзсэн “дурак” үзэгчдээр загнуулан зэмлүүлэн найруулж ирсэн. Тэд алддаг онодог ч урлагт хайртай сэтгэл нь хаачих вэ. Ядаж л тайзаа хүндэлнэ, уран бүтээлчдээ хайрлана. Алдааг өөр дээрээ үүрээд арьсаа хамгаалахгүй бусдыгаа чирч гардаг нь урлагийнхнаа ахлан зохион байгуулж явдаг хүмүүсийн бурхан ухаан.

Аавынхаа нэрээр олонд танигдсан Я.Учрал урлагийнхнаа нэг л хайрлахгүй байна даа. Тэгээд яаж тогооноос нь хоол олж идэх юм бэ? Т.Ариунаагийн тоглолт яасан, хэдэн мянган билет илүү хэвлэж зарлаа, багтсангүй зохион байгуулалт үнэндээ нойл. Т.Ариунаа муулуулж үлдлээ. Магтсан нь их тулдаа даагаад гарч байна. “Камертон” тоглолтын орлогоо луйвардуулсан талаар гол усаар нэг шуугиж байна. Дахиад “Аса Арена”-д тоглох гэж байна. Гэхдээ тухайн үед ажилласан багаа солиод өөрсдийнхөөрөө явах гэж буй хэрэг. Я.Учрал хандалт өндөр үед баавгай шиг сүрлэгээр гарч ирээд хандалт унах, асуудал гарах үед “Би мэдэхгүй” гээд ганц үг дуугарахгүй ичээндээ орох. Соёлтой, бас ч гэж урлагт олон жил зүтгэж сайн мууг үзсэн нуруутай учраас аль аль нь юм ярьсангүй.

Ийм эрсдлийн араас тэр “T-ARA” хамтлагийн тоглолтыг хийх ажилд ханцуй шамласан. Ухаандаа их эрэлттэй тоглолт зохион байгуулагч анзааны өмнөх хэдийнхээ нэрийг зарж идэж байна гэсэн үг л дээ. Тэгээд юу болов? “Би хэдэн дуу дуулахыг огт мэдээгүй. Зөвхөн пиар л хийсэн. Зохион байгуулагчид буруутай” ухааны юм ярилаа. Түүн шиг олон тоглолт зохион байгуулсан гэж цээжээ дэлддэг хүн мэдэхгүй байх боломжгүй. Дээрээс нь тоглолтонд оролцсон эмэгтэй дуучид, бүсгүйчүүдээ сошиалд шидэж өгөв. АЖ А.Долгорын шавь дуурийн дуучин Г.Энхнаран “Ave Maria” дуугаа аль жилийн өмнө дүрсжүүлэн цацаж дебют хийсэн. “Бодлын цагаан хун” дууных нь эзэн нэртэй дуучны зүстэй шавь. Сая түүгээр бараг “шал арчив”. Дэлхийд хамгийн өндөр үнэлгээтэй сонгодог урлаг манайд төдийлөн ойлгогдохгүй хүлээж авахад амаргүй ч зөв өнцгөөс тайлбарлаж болох л. Сошиалын хурц үзүүр өөрт нь чиглэхэд сарниулах зорилгоор ч юм уу тоглолтод оролцсон “Гала” хамтлагийн зургийг тавиад “Нутгийн атаман шиг ...” гэж дооглож бичиж суудаг ямар тоглолтын пиарчин байдаг юм бэ?! Анзаарахад “Гала” энэ зунжин гадаа тоглолтуудад оролцохдоо нэг ч хувцсаа дахиж өмсөхгүй шинээр хийлгэж имиж бүрдүүлэлтээ анхаарч байгаа нь түмний нүдэнд ил. Нүүр будалт, үс зүс, имиж бүрдүүлэлтдээ эмэгтэй дуучид чадлаараа мөнгө зардаг. Ядаж бүсгүйчүүддээ хайртай баймаар шүү дээ, хаа хаанаа. Дэлхийн од “T-ARA” хамтлагийн охид олон хүнтэй зургаа авахуулахдаа өөрсдөө захад нь зогсож бүх зурган дээр гарсан нь тэдний хүмүүжлийг тухайн улсад очоод үзүүлдэг хүндлэлийг харуулж байгаа юм. Манай монгол бүсгүйчүүд гоё сайхан байна, бахархам. “Гала” угаасаа л ягаан өнгөөр имижээ бүрдүүлж ирсэн нь “T-ARA” ихэвчлэн хар цагаанаар хувцасладагтай ижил төстэй.

Бид дэлхийн од “T-ARA”-г дэргэдээс нь дахин харлаа, үзлээ. Цаг агаар тохирсонгүй. Алдаа оноо яривал мэдээж Я.Учрал дангаараа биш олон хүний асуудал. Ер нь чаддаг чаддагаа хийж талх талхаа идвэл иймэрхүү зүйл гарахгүй. Мэдэхгүй салбартаа хөл тавих ийм л аюултайг Я.Учралын жишээнээс харж болж байна. Муу сайн хэлүүлдэг “Буян” Жагаа ах нарийн яривал олон тоглолтын ард гарсан толгой. Сайхан сайхан тоглолт тавьдаг даруухан менежерүүд, найруулагчид олоон. Энэ мэт урлагт хоноцын сэтгэлээр хандагсдаас урлагийнхан өөрсдөө урлагаа аварсан нь дээр. Одоо ч тэгээд оролцогчдоо ч муулдаг, тоглолтын эзнээ ч шавартай хутгадаг, болохоо байхаар сошиалд хаяад өгчихдөг түүний тарыг таних нь таньсан биз. Урлаг уг нь их сайхан зүйл ч салбарын бус хүмүүс л гаднаас нь хутгалдаж бохирдуулж байх юм даа.

Д.Сэргэлэн