Э.Амартүвшин жилд 5 тэрбум төгрөгийн цалин авдаг уу?

Дэлхийн сонгодог урлагийн ертөнц дуучдаа хамгийн шударга шүүлтүүрээр эрэмбэлдэг цор ганц тайз. Тэгвэл яг энэ өдрүүдэд Монгол дуучин дэлхийн №1 шилдэг баритоноор нэрлэгдэж, нэгэнт хүлээн зөвшөөрөгдсөн нь Монгол Улсын Ардын жүжигчин, Оскарын шагналт Э.Амартүвшин.

• Энэ жил 39 нас хүрсэн тэрээр Сүхбаатар аймгийн уугуул, СУИС-ийн дуулаачийн анги төгссөн.
• 2011 оноос олон улсын тэмцээнүүдэд оролцож эхэлсэн ба 2015 оны “Кардифийн дэлхийн дуучин” тэмцээний шагналыг хүртсэнээс нь хойш дэлхийн том тайзууд түүний өмнө хөшгөө нээж эхэлсэн.
• Өнгөрсөн жилийн дэлхийн шилдэг баритоны нэгдүгээрт Э.Амартүвшин эрэмбэлэгдэж, дуурийн урлагаар дэлхийд толгой цохиж буй Франц, Оросын дуучид түүний араас буюу хоёр, гуравдугаарт жагссан.
• Дэлхийн шилдэг дуурийн театруудад тоглогдож буй томоохон дуурийн гоцлоочдын нэг удаагийн гарааны цалин нь 10-17 мянган ам.доллароор үнэлэгддэг ба Э.Амартүвшингийн хувьд Ла Скала, Метрополитан, Большой театр зэрэг дэлхийн өндөр зэрэглэлийн сонгодог тайзууд дээр хамгийн өндөр ханшаар дуулж буй монгол дуучин.
• Түүний нэг удаагийн гарааны цалин нь монгол мөнгөөр 40-50 сая орчим төгрөг.  
• operabase.com сайтад дурьдсанаар Э.Амартүвшин 2022 онд 20 дуурийн 88 тоглолт, 2023 онд 16 дуурийн 60 тоглолт, 2024 онд 18 дуурийн 66 тоглолтод тус оролцож 2025 оны эхний хагас жилд Риголетта, Тоска, Аида зэрэг алдартай 10 дуурийн 41 тоглолтод дуулжээ.
• Өнөөдрийн байдлаар түүний дуулах 17 дуурийн 82 тоглолт хүлээгдэж байна
• Дундажлаад тооцвол нэг удаагийн гараагаараа 50 орчим сая төгрөгийн цалин авдаг тэрээр энэ онд 5 тэрбум орчим төгрөгийн цалин авах тооцоо гарч байгаа юм.

Энэ бол жинхэнэ эрэмбэ, бахархал, нэр төр юм.   

Гэтэл дэлхийн дуурийн урлагт толгой цохиж буй Э.Амартүвшин, Г.Ариунбаатар, Э.Анхбаяр зэрэг А зэрэглэлийн дуучдаа гонсойлгохуйц зүйлийг Соёлын сайд Ч.Номин саяхан ярьсан нь эрхэм сайдын хүндэлж явдаг уран бүтээлч нь Андреа Бочелли хэмээн мэдэгдсэн. Дэлхийн сонгодог урлагт толгой цохиж яваа энэ мэт Монгол дуучдаа юман чинээ тоодоггүй Соёлын сайд шүтэж явдаг хэмээсэн дуучныхаа нэрийг Бучела хэмээн буруу дуудлагаар хэлсэн зэрэг нь түүний соёл, боловсролын хэмжээг илтгэх мэт. Бид дэлхий хүлээн зөвшөөрчихөөд байгаа монгол баритоноо, ер нь монгол уран бүтээлчдээ хэзээ хүлээн зөвшөөрч, үнэлдэг болох вэ?