Дэлхийн шилдэг монгол баритон Э.Амартүвшин “Травиата”-д гоцолно
Монгол Улсаас авьяас, чадвараараа дэлхийд хүлээн зөвшөөрөгдөж, нэр алдраа цуурайтуулж яваа цөөн Монголчуудын нэг нь дуурийн дуулаач Э.Амартүвшин. Цэл залуу 20-иод насандаа Ж.Вердийн “Риголетто” дуурьд дуулж, хоолойныхоо цар, чадлыг гайхуулсан тэр цагаас хойш “Кармен”, “Травиата”, “Евгений Онегин”, “Аида” зэрэг том дууриудын гол болон туслах дүрүүдийг бүтээж, Итали, Франц, Герман, Австри, Испани гээд дэлхийн олон орны тайзнаас үзэгчидтэй уулзаж буй дэлхийн шилдэг монгол баритон тэрээр 25-тайдаа МУГЖ, 36-тайдаа АЖ цол хүртсэн.
Эх орондоо цөөн ирдэг түүний хувьд энэ удаад Монголчууддаа зориулан УДБЭТ-ын тайзнаа хоёрдугаар сарын 7-нд “Травиата” дуурьд ганцхан удаа тоглох нь. 280 мянган төгрөгийн үнэтэй тоглолтын тасалбар нь товоо зарласан даруйдаа зарагдаад дуусжээ.
Уг тоглолтынхоо дараа тэрээр Ардын жүжигчин цолныхоо мялаалга-найрыг хийхээр төлөвлөж байгаа аж. Түүнчлэн Ерөнхий сайдын 2026 оны нэрэмжит шагналыг хүртэж байгаа тухай мэдээлэл цацагдаад буй. Товчхондоо Улаанбаатарын соёлын ертөнц хоёрдугаар сард Э.Амартүвшингээр амьсгалан хаврын сезоны нээлтээ хийх нь ээ.
