Реппер ThunderZ-ийн бүтээсэн шинэ дуу 5 хоногийн дотор 2 сая үзэлт авчээ
Яалт ч үгүй энэ цагийн жинхэнэ нөлөөлөгч, урлагтаа тод од нь байж чадаж буй реппер ThunderZ буюу Өлзий-Учрал хоёр дахь бие даасан тоглолт хийхээ зарлалаа. Тэрээр 2023 онд анхны бие даасан тоглолтоо хийж, тасалбар нь талх шиг зарагдан, Төв Цэнгэлдэхийг дүүргэж байв. МУИС-ийг программ хангамжийн мэргэжлээр төгссөн ч мөрөөдлөө дагасаар энэ оргилд хүрсэн тэрээр 2025 онд “Тэнгри” хэмээх цуврал уран бүтээлээ цацаж, үзэгч фэнүүдээ шуугиулаад байна. Эл уран бүтээлийн эхний дууг “Жүрээм” нэрээр сонсогч, үзэгчдийн хүртээл болгосон. Харин сүүлд гарсан “Гэгээн” дуу цацагдаад ердөө таван хоногийн дотор 2 сая гаруй үзэлт авчээ.
Орчин цагийн урлагт уран бүтээл өнгө аясаараа аргагүй ялгардаг тэрээр “Backyard” тэмцээний ялагч болсноос хойш тасралтгүй уран бүтээлээ туурвиж, “Бүгд 0-гээс эхэлдэг”, “Дандаа даардаг охин”, “Ганцхан шалтгаан зэрэг” хит дуунуудыг бүтээсээр залууст болоод нийгэмд үлгэр дуурайлал болсоор буй. Мөн кино урлагт ч хүч сорьж, “Хувьсал” продакшны дэлгэцийн ес дэх уран бүтээл болох “Аминч” уран сайхны кинонд тоглосон гэжуга. Шаггүй жүжиглэдэг, ур чадвартай, авьяастай гэдгээ “Тэнгри” цуврал уран бүтээлээрээ харуулаад буй. Дан ганц дуулах бус, кино шиг клип хийж, санаа, зохиол, шүлэг гээд бүх зүйлдээ сэтгэлээ шингээсэн нь олны хайр хүндэтгэлийг татсаар байна.
