Доналд Трамп Bad Bunny-гийн Super bowl-ын шоуг түүхэн дэх хамгийн муу үзүүлбэр гэж шүүмжлэв

АНУ-ын бэлгэдэл болсон 60 дахь удаагийн “Super Bowl” аваргын төлөөх тэмцээн болж, Seattle Seahawks баг New England Patriots багийг 29:13 онооны харьцаатай буулган авлаа. Энэ тэмцээний хамгийн чухал, салшгүй нэг хэсэг нь хагас цагийн тоглолт байдаг. Үүнд дуулах нь алдартнуудын хувьд нэр төрийн хэрэг байдаг. Тэгвэл энэ жилийн “Super Bowl”-ийн хагас цагийн тоглолтод Пуерто Рикогоос гаралтай рэппер Bad Bunny дуулж, Лэди Гага, Рики Мартин нартай хамт үзүүлбэр үзүүллээ.

Тоглолтын үеэр Bad Bunny эв нэгдлийн утга санааг илэрхийлж, “God bless America” гэх хэллэгийн утгыг Чилиэс Канад хүртэлх Америк тивийн бүх улс орнуудыг хамарсан өргөн хүрээнд тайлбарлав. “Чили, Аргентин гээд Америк тивийн бүх улсыг Бурхан ивээг,” хэмээн тэрбээр Хойд болон Өмнөд Америкийн 20 гаруй улсыг нэрлэж, тэдгээрийн олонхын төрийн далбааг харуулжээ. Тэрээр АНУ-ын төрийн далбаа болон АНУ-ын харьяа нутаг Пуэрто-Рикогийн далбааны дэргэд зогссон байна.

Гэвч түүний дуулалт, бүжгийн үзүүлбэрийг АНУ-ын Ерөнхийлөгч Доналд Трамп эрс шүүмжилж, “Супер Боулын хагас цагийн шоу үнэхээр аймшигтай, түүхэн дэх хамгийн муу тоглолтуудын нэг! Ямар ч утга учиргүй, Америкийн агуу байдлыг гутаан доромжилж, амжилт, бүтээлч байдал, төгс төгөлдөр байдлын талаарх бидний стандартуудыг огтхон ч илэрхийлсэнгүй,” хэмээн Трамп Truth Social платформ дээр нийтэлжээ.

Мөн Трамп тоглолтын хэл найруулга болон бүжгийн хөдөлгөөнийг аль алиныг нь шүүмжилжээ. “Энэ залуу юу ярьж байгааг хэн ч ойлгохгүй,” хэмээн тэр Truth Social дээр бичээд, бүжгийг нь “жигшмээр”, ялангуяа АНУ даяар болон дэлхий даяар үзэж буй хүүхдүүдэд тохиромжгүй гэж тодорхойлсон байна.

Тэр өмнө нь Bad Bunny-г хагас цагийн шоуны уран бүтээлчээр сонгосныг “аймшигтай сонголт” хэмээн нэрлэж байсан удаатай. Дэлхийд хамгийн их стриймтэй уран бүтээлчдийн нэг Bad Bunny тоглолтоо Грэммийн шагнал гардуулах ёслолд түүх бүтээснээс ердөө долоо хоногийн дараа хийсэн нь энэ. Тэрээр I Should Have Taken More Photos” цомгоороо “Оны шилдэг цомог” шагнал хүртсэн бөгөөд энэ нь тус шагналыг авсан анхны испани хэл дээрх цомог болсон юм.